北海道親子之旅：行程篇（三）

Day 6：登別住：第一滝本館

遊：一早起身食過早餐之後，依依不捨咁同民宿講再見。車子倒後鏡中嘅村岡先生，不停揮手送別。我好有跳車擁抱佢嘅感覺。

今日要同契爺分道。我地會去登別，而佢地就會繼續東行。返到旭川市，我地先到火車站放好啲行李，然後還車。當日又落住大雨，契爺過咗對面日產，租咗架細巧嘅 Cube，繼續佢地嘅行程。而我地就坐火車返札幌市。

火車上，食咗個好味嘅便當，不過都幾貴。乜都冇嘅要七百幾日圓。下面呢個要成一千！

由札幌市坐 2:00pm 酒店巴士，到第一滝本館已經差不多 4:30pm。

安頓好之後，就到熊牧場玩。雖然只有一個鐘左右，但因為個場唔係太多野玩，而且太夜都冇表演，所以玩得好快。可以坐下纜車、餵下熊人，雖然落住大雨，Jayson 都玩得好開心。

之後就同佢去浸溫泉、食自助晚餐。因為瞓地下實在太過好玩，所以搞咗好耐先瞓到…

Day 7：登別、札幌
住：京王 Plaza 札幌酒店
遊：第二朝，晨咁早俾 Jayson 踢醒。我就趁機會去浸個靚溫泉。浸完就一齊去食自助早餐。咁嘅生活，同大肥豬冇乜分別。但如果可以日日係咁，做隻豬又如何？！哈！

不過食飽飽都要做下運動。呢度個溫泉，下層有個遊泳池。不過 Jayson 連啲滑水梯都唔敢玩，只係喺水中行來行去。

臨離開酒店之前，我地去咗「後山」嘅登別地獄谷。上次嚟，仲記憶尤新。今次唔同嘅，就係推多個人上嚟。

其實呢到可以一直行上去。上次我地行到好遠，見到條路都幾好行，幾舒服。
途中仲有赤鬼…

同青鬼。我同 Jayson 講，如果小朋友唔乖，兩隻鬼就會嚟打屁股！（其實我都冇講錯。佢地係「老閻」嘅手下，落嚟維持治安。）見到嗰兩支狼牙棒，你都咪話唔驚…

離開地獄谷，我地就向登別海洋世界出發。海洋世界喺火車站附近。由酒店去，我地坐咗二千日圓嘅的士。

呢到地方唔大。睇埋表演，相信三四個鐘都玩得晒。而我地喺嗰度仲食咗個午飯。午餐做得非常唔錯，好過香港啲樂園好多。豬扒又厚又多汁，而我就食咗咖哩鱈魚飯。價錢仲一啲都唔貴。但喺呢啲地方食魚，總有啲怪怪的嘅感覺。究竟啲魚… 會唔會係… 大魚缸入面啲… 仙遊咗嘅魚呢？

跟海豚說過再見之後，就坐火車返札幌市。車費真係好貴。記得上次諗住慳啲，冇預約座位，最後企咗成個鐘先到。今次咁多野，又帶住 Jayson，唯有每位大人俾多七百日圓，留個位啦。

返到札幌市，先到酒店放底啲行李（幫我地攞行理嘅係另一位靚靚姐姐）。之後就去行街街。

行到 Tokyu Hands。呢到好明顯係香港人必到嘅地方。入面全部都係香港人！入面有好多得意野，但冇一樣買得落手。行到關門之後，我地就去醫肚。喺日本最後嘅一晚，當然要食餐豪㗎啦。而 Jayson 媽最鐘意就係：蟹本家。每次去日本都要食…

Jayson 食得好開心。由頭食到落尾，加上係坐地下，行來行去不知幾興奮。佢仲不停咁話：「媽咪，我要食龍蝦（指住啲蟹）呀！」第一次食咁多蟹，好彩冇敏感！

之後，就慢慢行返酒店。日本街頭，好多酒過三巡嘅人。好多都飲大咗，行嘅時候都要提防提防。行行下去咗類似紅燈區嘅物體。真係眼界大開（好彩 Jayson 瞓咗…）！

Day 8：札幌
住：返屋企
遊：最後一日，我地要去二條市場食早飯同買蟹。我地搞掂晒啲行李之後，決定慢慢行過去，順便可以四圍望下影下。

經過狸小路，俾我地發現咗間夾公仔嘅舖頭。今次收獲都算大，但付出就… 唉…

「爸爸，您好叻呀！夾到咁多珠珠！」

早飯喺どんぶり茶屋。原本好有期望，但都係好普通。啲魚生同 Jayson 啲蟹肉都好新鮮好甜，但啲飯煲得唔好。失敗！

「Jayson，快啲食啦！您啲「龍蝦」呀！」

「媽咪，您唔好呃我啦。你估我分唔出咩。」

而且都幾貴，最平都要一千二百日圓左右一碗。推介嗰啲要成二千日圓！好彩我地有優惠卷，可以換到小食一客！

食飽飯，就去買蟹做手信。之前我地幫襯開蟹吉，佢嘅特點係即叫即烚。其它檔口嗰啲，都唔知仙遊咗幾耐。我地買咗兩中隻（之後俾九大兩細食咗），要一萬八千日圓。感覺上比上次買貴。不過好食都冇計啦！

店長五十嵐先生都好好人。自動打個折頭俾我地之外，我地想買海膽，佢冇，佢叫我地去隔離舖頭買過嚟，然後幫我地裝入個蟹箱入面，真係唔話得。

除咗蟹之外，呢到仲有好多手信買。Jayson 媽買咗一大堆返佢公司。之前喺 Pension & Restaurant La Collina，有個沙律落咗幾粒白粟米，甜得好緊要！從未試過食啲咁好食嘅粟米。我地見有 280 日圓一條，就買咗四條返香港（雖然都甜，但冇之前食嘅咁靚。唉… 村岡先生，我好掛住你呀！）。Jayson 媽仲見到有啲用鹽水浸住嘅海膽。據聞常見一板板嘅海膽，係落咗防腐劑。呢啲用鹽水浸住嘅就冇，但好快會壞。我地用咗三千日圓買咗一盒，我估有大半板左右。（之後返到屋企食，超甜超軟熟超新鮮！同平時食嘅有好大分別。）

當財散人安樂之後，我地就返酒店攞行李。最後，我地有：一大一細行李箱、一箱蟹、一大袋手信、一個背囊、同 Jayson 架車仔。兩個人，仲要拖住 Jayson，都真係幾吃力。所以我地選擇坐巴士（一千日圓一位）去機場，起碼唔洗上上落落。

做完登記手續之後，我地行返去舊嘅內陸機場。其實都唔係好遠，五分鐘左右行得到。嗰邊多好多野買。我地再買多幾盒手信，同埋食多一個雪印嘅軟雪榚，為我地呢次嘅旅程，劃上一個完美嘅句號。（最後用剩一萬一千日圓。死未？！）

小飛機上，有好多好細個嘅小朋友。個個都喊到七彩，真係聞者都覺辛苦。回程嘅影音系統先進好多，想睇乜就睇乜，幾時睇都得。Jayson 睇佢嘅 Mickey Clubhouse，睇到非常入神。可惜得兩集！好心佢就放多啲啦。整程機都好開心，起飛降落都有飲水。真係要俾十個叻俾 Jayson！

（行程完畢… 待續…）



~ Lindberg