北海道親子之旅：親子樂園篇 旭山動物園

「今日一早就要起身，因為八點半就已經要嚟到火車站，坐 choo choo train 去旭川市。我地要攞埋啲好大件嘅行李落火車月台。好彩有契爺喺到，如果得爸爸一個，我真係冇眼睇。」

「喺火車上面，我教媽咪一陣去到公園要睇啲乜。我要睇 Giraffe 啦、Penguin 啦…」

「過咗冇幾耐，我就陪爸爸瞓著咗喇…」

「去到旭川市，我地要轉巴士去我地嘅目的地：旭山動物園。但因為我地行李太多，我地喺火車站嘅儲物櫃搞咗好耐，錯過咗一班巴士。下一班差不多要等一個鐘，所以我地去咗附近嘅便利店坐下。爸爸同契爺就最鐘意去便利店買野飲。」

「坐咗大概半個鐘頭車之後，我地就到咗動物園！」

「入到去，我見到一條大斜路。我捉住契媽，不停同我行上行落。」

「行到上斜路頂，就開始見到一啲動物館。」

「門口有幾個特別嘅館：包括海豹、企鵝、北極熊等，有好多人排隊入去睇。有啲館要排半個至一個鐘！媽媽話感覺就好似去咗世博一樣，但啲人當然有秩序好多。咩係世博呀？」

「海豹館好得意。啲海豹可以向上向下游喎！」

「嗰日好似都烈日當空，幾熱架。雖然有啲厚雲，但大部份都係見到藍天。」

「我見個地下俾太陽曬到咁熱，我就幫手吹凍佢。見到啲沙粒被吹來吹去，好得意。哈哈…」

「呢到啲展館其實好細。每一個館都好快行完。不過都做得幾得意，好有心思。例如呢條企鵝館隧道…」

「望上去可以見到啲企鵝喺到飛（游）！好搞笑呀！」

「除此之外，呢到嘅設施非常有心，坐住車仔嘅我，或者坐輪椅嘅公公婆婆，都唔驚有任何障礙。」

「Tiger 呀！」

「Lion 呀！」

「其實我對睇動物興趣唔大。屋企都已經有姐姐陪我玩啦。我都係鐘意行上行落多啲。」

 「Up the hill！」

「整呢個動物園出嚟嘅人除咗有心，仲好有心思。北極熊館有條地道，從天窗望出嚟…」

「係可以見到熊人行過！好搞笑…」

「行咗一個朝頭早，又嚟到爸爸最開心嘅時候：開飯啦！今餐有炒麵、唔知咩肉飯、炸熱狗。」

「起初睇咗啲動物館，爸爸話有啲失望。因為規模好似唔大。但行下行下，其實都幾多動物喎。」

「呢到仲有小熊貓，不過睇得唔清楚。香港海洋公園好睇啲。」

「但爸爸話呢到有隻動物，連佢都未親眼見過！就係：大野狼喇！」

「呢到又有條隧道。爸爸抱我上去睇，乜都見唔到。我都唔知佢走咗去邊。」

「但當我出到外面，就見到佢啦。嘩！Big doggie！」

「大野狼，下次你要乖乖喇，唔係就會俾人剪開個肚皮㗎啦。」（我好怕同 Jayson 講童話故事，我覺得好血腥變態！）

「呢到有好多動物。但因為開始行到有啲無聊，我就開始扭計，要亂咁去。最後，就俾契媽教訓。」

「不過之後我都乖番，繼續行。」（我地好高興見到契爺契媽幫我地教仔。唔係要佢地嚟做乜呀？哈哈哈哈…）

「呢三隻 Owls 好搞笑。個頭可以氹氹轉喎！唔知點解，爸爸睇到不停叫救命…」

「除咗真嘅動物，假嘅都好搞笑。哈哈哈…」

「Monkey 呀！」

「起初爸爸話啲支架整得咁誇張，真係當啲馬騮傻嘅咩，點會爬喎！但原來真係會㗎。唔知邊個先至傻呢？」（其實契爺都係咁樣講。）

「睇咗成日野，我終於攰到瞓著咗。」

「最後，都係睇唔到我想見嘅 Giraffe。唯有睇爸爸啲相啦。」

「我瞓著咗嘅時候，發生咗段小插曲。話說佢地四個大人推住我去公園另一個出口。」

「點知呢個出口冇巴士站！因為差不多夠鐘上巴士，於是爸爸同契爺就提起我架車仔，跑落上面嗰條樓梯。」

「再用獵豹嘅速度，跑去原本個入口！好彩，到最後都趕到上巴士。唔係就有排等下一架啦！」

動物園俾我嘅印象，起初係有啲舊。而且依山而建，加上烈日當空，放假人多，行起上嚟都幾辛苦。不過行下行下，發現都幾多野睇。而且啲野都幾集中，後尾都行得幾舒服㗎。


~ Lindberg

P.S. 「好搞笑」係 Jayson 嘅口頭禪。但最搞笑係佢講嘅語氣。真係好搞笑！哈哈哈哈…