北海道親子之旅：行程篇（一）

今次旅程除咗開心之外，有好多野都令我有好深嘅感受。所以我決定先寫一個簡單嘅行程誌，之後再分：《親子樂園篇》、《發花癲篇》、《民宿篇》、《美食篇》、《富良野肚臍祭篇》、《戰車三重導航系統篇》、及《親子浴篇》。北京填鴨最多都只係一鴨三食，我今次勁過隻鴨呀（講完自己都打咗個冷震…）！兩篇《民宿篇》更會以英文寫，因為佢地令我實在太過感動。我希望可以俾民宿主人睇番，傳達我小小嘅敬意。

Day 1-2：札幌
住：京王 Plaza 札幌酒店
遊：因為契媽件行理漏咗喺香港，所以我地喺機場搞耐咗。

坐火車出城，去到酒店已經 6:00pm。京王 Plaza 札幌酒店，離火車站大約 5 至 10 分鐘腳程，都算方便（而且幫我地攞行李啲姐姐好靚！）。但酒店就舊咗啲，周圍乜都冇。我地第一個目的地：買火車票。原本想訂好可愛嘅「旭山動物園號」，喺第三日坐去旭川。但當然訂唔到啦！架車一日得一班，又唔多位！無辨法啦。

之後因為契爺同我要止痕，所以去咗睇相機野。我就買咗個好啱部 PEN 嘅相機袋，超開心！興奮過後，個肚開始打鼓，於是就去搵麵食。因為我一時唔記得札幌有幾細，契爺又驚我地帶住 Jayson 怕行，所以坐咗一個站地鐵。短短一兩分鐘車，多謝盛惠 200 日圓（即 HK$18）！黐線地貴！行出地鐵站，其實都睇得到起點！激死！

原本想去嗰間麵店，原來喺百貨公司入面，當時都差不多七點半，已經關門大吉。喺冇主意之下，唯有去最安全嘅…「味之時計台」。

去食麵之前，仲路經雪印。趁佢關門之前，食咗個 Royal 雪榚杯。Jayson 喺香港唔食雪榚，但嚟到日本就狂要食。果然識貨！

第二日，我地晨早坐巴士去咗「滝野鈴蘭丘陵公園」。一個非常唔錯嘅親子公園。之後再慢慢講。

返到札幌市，走又去雪印食雪榚。今次坐低食杯大嘅！

之後去火車站隔離嘅 Namco 夾公仔。契媽夾到一個大過 Jayson 個身嘅 Elmo…

入面竟然有間寵物店，我地買咗條貓頸鍊俾 Julie 做手信。然後就行 Muji。晚飯原本想去「牛角」食燒肉。我記得呢個名，因為之前佢出咗個 PS2 嘅遊戲。但因為要等一個鐘，而當時已經 8:00pm，所以去咗一間冇乜人嘅天婦羅。但冇乜人嘅店都要好好味，死未？！ 

Day 3：旭川
住：薫風舎
遊：我地坐 9:00am 句嘅火車到旭川，去遊「旭山動物園」。講真，有啲失望，因為比想象中少野睇。其實每次去動物園，心情都好複雜。好高興見到啲動物，但見佢地被困住又好唔開心。唉…

返到旭川市，就去攞車！今次我地租咗架豐田 Wish，四日三夜要三萬六千日圓。五個人分，都還可以。因為我地行李多，Jayson 又一定要坐嬰兒座，所以要架大啲嘅車。第一次開七人車，心情非常緊張！

差不多到 6:30pm 晚飯時間先到民宿。條路好易行，七人車亦冇想象中咁大架，只係油門同煞車制需要適應一下。喺四個大人十隻眼之下，我地搵到目地的。等住我地嘅，喺一頓豐富美味嘅法國菜！

（續…）



~ Lindberg