報業道德何在？

上星期五（2012年1月27日）返工途中，收到 Jayson 媽一個短訊：「有份報紙盜用咗 Jayson 張相！」因為發現得太遲，嗰份免費報紙都已經俾人攞哂，好在網上版都睇得到。一望到張相和旁邊幾個字，只好無奈嘆一口氣。

相片係 Jayson 媽影嘅，出自我一篇網誌，內容係講請工人及唔希望 Jayson 變做「港童」。其實放得出嚟，就唔介意俾人睇或評論。正如有人將自己啲情慾照放上網，就算佢點樣加密都好，都應該有心理準備全世界都睇得到。但睇還睇，不問自取，道德何在？早前亦有網友被報章盜取其網誌之相片。今次發生喺自己身上，先真正感受到嗰份憤怒及無奈。

我希望呢個只係排版員工嘅疏忽，而唔係文章作者所提供。可能排版員為咗趕工，隨便上網搵張相，鋌而走險攞嚟用，都確實有佢嘅苦衷。Jayson 張相好易搵得到。之前喺 Google 上面打「港童」兩個字，就會彈出嚟。不過因為我搞過張相，所以依家嘅排位應該去咗街尾。其實我個網誌都唔多人睇啫，估唔到排位會咁高。唉… 真係叫人失禮。

但如果相片係作者提供，咁就覺得好不恰當。一個教人教仔嘅人，可以咁裡表不一實在叫人匪夷所思。因此，我寫咗封電郵俾報章嘅編輯：

「今早（2012年1月27日）發現 貴報於副刊中的《愛孩子 拒當直升機父母》一文，盜用了本人網誌的圖片。該圖片是我們所拍攝並擁有，上載於網誌上只供該文章分享用途。貴報沒有尊重知識產權，擅自盜取圖片並刊登於報章上，實在令人憤怒及失望。

http://lindberg.blogspot.hk/2010/08/hongkongchild.html

希望 貴報的編輯，能夠盡快給我們一個合理的回覆。否則，本人將會去信知識產權處投訴及於社交網站公開貴報之盜竊行為以作公論。」

如我所料，音訊全無。唉… 我相信係嗰句：「去信知識產權處投訴」穿咗餡。知識產權處根本唔會接受投訴！所以人哋編輯先唔會理我。

我之所以咁失望，係因為呢個已經唔係傳媒道德嘅問題。我可以接受「看圖作文」或「斷章取義」等嘅行為，因為嗰啲都係有限度自由創作。但不問自取都得？！唔詢問拍攝該照片嘅 Jayson 媽係「無禮」，對網誌嘅主人（我）係「不義」，偷係「不廉」，做錯事而唔作出補救係「無恥」。當一份市民賴以為信嘅報章，竟然喺小事上都可以做到咁無「禮義廉恥」，叫人仲點可以相信上面寫嘅嘢呀？

當報業口口聲聲鬧人唔尊重新聞自由，我好希望佢哋都識得尊重下別人，做事唔應該有雙重標淮。「版權所有，不得翻印」咁簡單嘅八個字都唔識，真係枉為傳媒文化界。敬希業界自重。



~ Lindberg