丼丼屋食堂試食會

上星期日，丼丼屋食堂邀請我哋一家到佢哋喺太古城嘅新店試食。自從佢開幕之後，丼丼屋一直都係大排長龍。既然咁近我哋屋企，我哋又想試下，當然一口答應啦！

丼丼屋食堂
地址：太古城中心1樓102號鋪
電話：2164 8636

公關公司嘅 Stephanie 及 Dora 非常貼心，喺我哋等候其他 Blogger 嘅時候，攞咗本書俾 Jayson 玩。原本都好擔心佢會悶，依家就唔驚啦。

其實之前都去過圓方嘅丼丼屋食堂。但因為嗰次食得趕頭趕命，無好好地了解一下。今次有 Stephanie 介紹一下，先能夠加深認識。顧名思義，丼丼屋係食丼（日式碗飯）。跟據 Stephanie 所講，丼丼屋嚴選日本新潟縣嘅秋田小町米，並用 RO 水去煲。以前我哋屋企都會買日本靚米，配以日本礦泉水去煲飯。但自從要養多個工人之後，已經冇咁有要求啦。所以可以食到一碗彈牙靚飯，真係可以好開心！

開始上菜啦！刺身盛合三款（$88）：我哋呢碟好新鮮。刺身唔係呢度嘅主打，所以無諗過可以食到咁甜美嘅刺身。

燒玉子卷（$28）：雖然蛋卷睇上去好似好易煎，但要做到厚身軟滑，都幾有技巧。蛋卷上面仲灑咗少少柚子碎，加添一陣清新嘅香氣。

吉列廣島蠔（$78）：剛剛先跟 Jayson 媽講起喺屋企炸生蠔有幾難，估唔到就有得食。廣島蠔炸得啱啱好，香脆之餘仲有好濃嘅蠔味。

配合酥炸食物，日式餐廳都會用即磨芝麻醬。Jayson 幫手磨芝麻，香氣噗鼻，立即食慾大增！

「Smell Good！」

滑蛋雞肉丼（$48）：我其實好怕呢個食物，因為佢有另一個名：「親子丼」。雞同雞蛋，媽媽同個仔，諗起都想轉食長齋。不過呢度嘅滑蛋雞肉丼做得唔錯。喺其他餐廳食，好多時候都會落好重鰹魚汁，蓋過其他材料嘅味道。雖然我哋呢碗係濕咗少少，不過味道剛剛好，而且啲米飯真係好好味。

兒童定食（$48）：好健康嘅一個兒童餐。有沙律、主食、果汁。咁嘅價錢，家長可以毫不猶豫咁叫俾小朋友食。不過我對沙律有保留，Jayson 咁大個仔都冇俾佢食。而白飯可能因為要「倒模」嘅關系，雖然都係靚米，但外面就風乾咗啲。

北海道咖啡特飲：因為今日好早起床，所以食到半路中途，我需要叫杯咖啡充一充電。但竟然發現咖啡只係配角，主角係上面嘅北海道軟雪榚！Jayson 食過一啖之後，立即精伶哂！功效仲厲害過啲咖啡（當然佢冇飲到啲咖啡啦！）！

明太子冷烏冬（$48）：太古城店獨家限定新品。明太子係用辣椒及香料醃製過的明太魚嘅魚子。冷烏冬好彈牙，加上辛辣嘅感覺，非常醒神！我用筷子將塊紫蘇葉撕開，跟啲麵一齊食。我唔知佢會唔會只係裝飾，不過香草嘅味道，可以減少明太子嘅腥味。怕腥嘅朋友不防試試。

忌廉蝦烏冬（$68）：同樣係太古城店獨有。呢碗嘢真係好攞命！漏到爆，但係香到忍唔住一啖一啖食落肚。罪疚感非常大。大蝦只係配角，啲忌廉湯底真係香滑得好緊要。我無諗過明明已經飽到發悶嘅 Jayson，都自動嗌住要食多幾啖。係一個好適合同小朋友分享嘅烏冬。

北海道雪榚新地（$38）：用北海道 3.6 牛奶做嘅軟雪榚，奶味非常濃郁。淋上抹茶、十勝紅豆、及煙韌嘅團子，好一個「宇治金時」。

因為抹茶帶有苦澀味，Jayson 麻麻地。呢到嘅哥哥好好人，整咗個甜筒俾佢喎。發達啦！

三得利角瓶威士忌梳打（$38）：對於「三得利（Suntory）」，即使我唔飲威士忌，都會記得 比爾默里喺《迷失東京》入面嘅對白：「For relaxing time, make it Suntory time…」而呢杯大大杯嘅 Highball，即威士忌加梳打水，據悉喺日本時下非常流行。清新香味及爽快口感，豪氣地大口大口咁飲，不禁「啊」咗一聲出嚟。爽呀…

同一個表情，果然係兩母子。

同場仲有幾「隊」Bloggers。場面都幾熱鬧㗎。星期日下午四點左右，餐廳唔算多人。呢度嘅裝修樸實簡單，令人坐得好舒服，唔會覺得拘謹。

最後，感謝丼丼屋食堂及公關公司 Waggener Edstrom 邀請我哋嚟享用咁豐富嘅一餐。總括嚟講，食物嘅質素總會有改善嘅空間，但呢到確實係一間不錯嘅家庭餐廳。睇佢個開心樣就知道啦…

~ Lindberg