粗口學系

尋日明珠台做 House（神醫）第二季。我鐘意睇 House 因為多得意野，而且 Hugh Laurie 做得好好。好難想像佢就係「一家之鼠超力仔」入面和藹可親嘅爸爸。但係 House 唯一睇得辛苦嘅地方，就係佢啲醫學例子好神化，好多時都會用啲幾深嘅術語。尤其第一季開頭幾集，都唔知係唔係專登玩野，等觀眾以為個編劇好勁。作為一個生化系嘅畢業生，有時都用啲時間去諗吓佢講乜。

提起生化系，我突然諗起以前同班同學無聊自創嘅兩個粗口學系。諗返起都覺得以前真係極之無聊。哈！

以前上大學，個天好唔公平，我地差不多日日都要返早堂。每朝上完第一堂之後，就會去 Lee Hall 食早餐同吹水。去 Lee Hall 最鐘意食四腸早餐，四條腸加洋蔥汁，極不健康。

有一日，同學阿笨無端端問我知唔知有個學系叫做：Department of Bromochemistry。我地 Department of Biochemistry 叫做生化系，Bromochemistry 真係未曾聽過。

跟住阿笨就俾貼士我，話 Bromo- 嘅原字係 Bromine。我心諗，邊到有科化學讀得咁專，淨係讀 Bromine 呀？！一定係玩野！

佢於是問我 Bromine 中文係乜。Bromine 咪係「溴」囉。我地 Biochemistry 叫做生化系，咁 Bromochemistry 咪係…無聊粗口仔！攞諧音！低能！

無幾耐之後佢又嚟玩過。今次係 Department of Agricultural Management。阿笨話除咗會教農務管理，個課程重點係教你點樣去「調理」。救命！我點解有啲咁低能嘅同學？

當我以為人大咗會好啲，點知之前去一個同學嘅婚禮，佢用金粉同星星裝飾張餐枱。同學阿伯就無聊用牙簽去撩啲星星，然後口中念念有詞：

「挑這星兮…」

心諗，人大咗會吟詩，真係高雅。點知佢跟住嗰句…

「…挑那星」

原來又係借機講粗口。死未？




~ Lindberg

P.S. 以上學系，純屬虛構。如有雷同，實屬巧合。

P.P.S. 係畢業之前，我為自己班做咗一本班刊。入面由各位同學以記敘形式，將本班發生過嘅趣事，一一記錄低。事隔多年，依家每次攞出嚟睇都會笑到流眼水。