今朝晨咁早起身，俾人老點咗，話要坐綠的先入到黃石，所以約隊友係坑口綠的站等。點知因為七點未到，的士連影都無隻！唯有坐小巴入西貢再轉綠的入碼頭。點知後尾先知乜的都入得黃石！俾某人激死！
入到黃石就有專船送我地入西貢灣仔。
我地足足早咗兩個鐘入去。無野做就响到影相留念同食大會提供嘅香蕉，未出發先食飽。就算有個乜野大吉利事，都可以做隻飽X……哈！（呢句係 Benny 講嘅！）
今年我地隊員方面可謂人材頂盛。雖然無咗阿蘇，但係有番老霍 Benny。Benny 除咗係學界精英中嘅精英（以前），跳高、跳遠、三級跳王者（以前），綽號：「聖記跳九里」（以前），最近重有玩毅行者（嘅 Support Team…）。另外仲有個肚腩好似佢老婆（有咗八個月身孕）咁大嘅阿殘，勝在能量充足。最後當然有多年經驗嘅阿 Todd 同我（但係行都行唔郁）。聖記山頭敢死隊必勝！
今次好彩阿殘有買勞工手套，如果唔係今次一定好傷。我就衰啦！記得提人帶指南針同哨子，自己就唔記得帶！無記性到死！好彩問到人借。多謝鄧生！ 我唔會怪你今朝老點我地嘅！
有啲人玩野外定向玩得好專業。相比之下，自己就好好似 BB 學行一樣。
原本以為今年無乜人參加，因為我地遲咗好多先登記，但係個號碼都好前。點知原來都好多人玩喎。有得玩又做到善事，好呀！仲有好多一家大細嚟玩，不知幾開心。
我地係男子四人組，所以第一班出發。我年年都堅持玩男子四人組。一來合作性高，二來難度都高啲。一起步，我地就跑埋一邊睇地圖。條大路一啲都唔難行，地方都唔算大。死就死在啲檢查站全部離條大路好遠。要上上落落之餘，仲收得好埋！玩死人咩！
我地都算一路順利。雖然睇錯地圖，又勇字行頭，死沖爛沖，不過都叫做有驚無險。啲檢查站真係收得好遠同好埋。阿 Todd 為咗一個十分（最小）嘅檢查站，行到死死下。我地亦都終於明白乜野叫做：路係人行出嚟！下次記得同我帶開山刀！我仲扮勇，自己一個跑到老九蓮咁遠，攞咗個最高分嘅檢查站。勁！不過代價就係聽日行唔郁，哈！
我們的最後成績係有一百分。原本應該有一百五十分，但係因為遲到，所以扣咗五十分。不過跛咗都贏五隊，算係咁啦。哈！
~ Lindberg
沒有留言:
張貼留言