Wii：未出發，先興奮！

成班朋友都叫我買 Wii，但係我堅持要等行貨。前日上 Ardy 屋企玩，佢屋企有齊三部新一代遊戲主機。而我終於忍唔住手，買咗個手制（先）上去加入戰團。未買機，先買手制；未出發，先興奮！哈！

一對 Wii 手制係東方188買要 $480。我見買主機應該只跟一套，而遲早我都會買，所以就買定一套上去 Ardy 到玩。第二時買埋主機咪有兩套囉。

今次係第二次玩 Wii。第一次係初三拜年嗰日，係人地到玩咗一陣。啲遊戲的確幾特別。同 PS 或 Xbox 嘅玩法好唔同。 遊戲好易上手，好適合一家大細一齊玩，招呼朋友更加一流。但係亦都因為咁，一個人玩會勁無聊。

前日係 Ardy 到玩完，尋日 Ronnie 又帶佢部 Wii 上來我屋企拜年。兩日加埋唔知打咗幾多場拳擊、棒球、高爾夫球、保齡球…今日對手都舉唔起，嚴重運動勞損。哈！其實諗諗下，我都唔洗買機啦。想玩咪帶埋個手制上人地屋企到玩咪得囉。哈！



~ Lindberg

P.S. 尋日仲同 Ronnie 玩好耐無一齊玩嘅煮飯仔。意式雜菜湯（用打邊爐食剩嘅旺菜當椰菜，得喎！）、煙三文魚凱撒沙律、芝士焗大蝦（掛住吹水，燶咗小小）、青口意大利飯（Al Dente！），好好味！