http://www.mandarinoriental.com/hotel/514000236.asp
頭盤，我要咗個 Oyster Shooter 三隻。用三款唔同 cocktail 去襯托隻蠔仔。好味！用荔枝加唔記得乜酒最好味！令到隻蠔好甜好好味！
水泡媽飲龍蝦湯。睇落好好味。不過就話鹹少少。但係唔敢話：「The soup is too salty.」因為章子怡在 Visa Card 的廣告。哈！
啲麵包勁好食！
我嘅主菜係美國西冷扒，好味得好緊要！我要五成熟，就真係五成熟。皮脆肉嫩汁多。我已經唔記得幾時食過一塊咁好嘅牛扒！好食到喊咗出嚟。
水泡媽食肉眼扒。佢怕太生（又係為咗水泡），所以我叫佢食肉眼，要七成熟。肉眼脂肪多啲。原則上熟啲都得。不過可能個火大咗少少，表面濃咗啲。加上塊扒唔夠肥，有小小乾。但係如果唔係有我嗰塊西冷，呢塊我都可以接受。
甜品係梳乎里。個侍應話唔係好大個，所以我地一人一個。我叫咗一個橙酒味，佢叫咗一個朱古力味。好好味，但係都唔細件囉！飽到反肚！
仲未完！因為叫咗咖啡飲，所以有「座」petit four，其實我都唔知係唔係因為杯咖啡定係人人有份。有幾件朱古力同蛋糕仔。好甜，又好飽，所以解決唔晒。唉…
多謝盛惠：$17XX。放低舊幾水做貼士，因為服務真係唔錯。笑容好夠，好專業。
不過二人枱就擠迫咗啲。枱同枱之間距離唔夠，係高級餐廳會俾人感覺少咗啲私人空間。除此之外，環境都好舒服。Open Kitchen 可以望住人地做野，好得意。
~ Lindberg
P.S. 食得太飽，水泡媽個肚好漲。之後有啲肚瀉。唉…
P.P.S. 大鑊… 依家先記得無吹過蠟燭！出事啦…
沒有留言:
張貼留言