非常時期食非常食物

上星期日，原本約了 Jayson 契爺等一班朋友食晚飯。但因為食完啲藥真係攰到手都舉唔起，縱使去得到，Jayson 都要 Jayson 媽全程獨力照顧。有見及此，唯有放大家飛機，乖乖地留喺屋企。見屋企冇乜糧草，想自己煮都唔得（而且都有心冇力）。而且當晚有大量奧運賽事，非常時期，就當然要食非常食物。Pizza Hut 外賣！只係冇諗過會係非常「難食」嘅食物。唉…

我地叫咗一個 DBS 特惠套餐。$215，有一個環球美味批（大Viva批）、車打海鮮焗飯、小食格格拼、和兩個蘑菇忌廉雞湯。所謂環球美味批，係一批有三個唔同國家嘅味道。我選擇嗰個有：京醬大蝦、芥末肉腸、沙嗲雞肉。而小食格格拼就有：雞腿骨、原味雞翼、繁星雞塊及脆炸薯角。以上兩樣食物，我可以用超難食去形容！

都唔知係唔係真係非常時期嘅關系，太多人落單，啲野係咁依煮熟就算。先講個小食格格拼。全部都炸到白雪雪，似白灼多過似炸。雞翼，冇味。脆炸薯角，又濕又腍。繁星雞塊，等 Jayson 媽仲以為係魚，爛肉一塊！雞腿骨，唔識形容…

個批仲大鑊！雖然自己近排食得多好味嘅薄餅，但未至於食到咀刁。哩個唔知乜野 Viva 批真係好難頂。我記得之前都試過一次，不過都冇咁差。今次哩個非常之乾之餘，仲冇乜味。我相信個批底係預先焗好，之後再放料上面。焗嘅時間會短好多，不過如果處理得唔好，個批底就會變成咁：勁難食。為咗充飢，我塞晒入個口入面。感覺非常可悲。

好後悔點解唔行幾步路落吉之島。肯行兩步，咪有好味嘅外賣薄餅食囉！不過鬼叫我行都行唔郁咩。唉…

我突然間記起我一個同學喺加拿大做薄餅店嘅經驗。佢話試過有人臨關門先打電話嚟叫外賣。有單就當然要做啦，而且仲非常「用心」去做添。個批底經過「特別」處理，保證味道帶有廚房地下嘅味道。如此行為，作為一個餐飲從業員，當然不敢恭維，因為真係會食死人。而作為一個食客，亦都令我知道幾時叫外賣先最安全。正所謂寧願得罪小人，都莫得罪廚師。哈哈哈…



~ Lindberg