漢堡包之 Big Bite

早排唔知點解成日好想食漢堡包。繼去過 Burgeroom 之後，又去咗北角另一間漢堡包店。

Big Bite
地址：北角英皇道560號健威坊U12號(向七姐妹道)
電話：2155 1066

漢堡包店細細間。一入去就有好有陣好勁嘅油煙味，可能套抽氣系統有啲問題。坐位有大約二十個。令我最欣賞嘅係有個洗手盤。食漢堡包又點樣可以唔整污糟對手。咁方便有個洗手盤俾客人用真係好好。

啲漢堡包名有啲似 Shake'em Buns。可能都係啲 ABC 或美國留學生開嘅。今次我地叫咗一個煙肉漢堡、辣肉醬熱狗、芝士肉汁薯條、普通薯條、同埋兩杯氣水。一共盛惠 $141。

個包整體上比較細，但漢堡扒都好有份量，有五安士左右。而漢堡扒係我鐘意結實嗰種。咁先至有咬口㗎嘛！裡面嘅煙肉並非煙腩片。而係老麥煙肉蛋漢堡嘅煙肉片。不過食落去冇乜肉味。可能係成本關系，用唔到上等嘅牛肉。不過我更覺得係因為啲油煙。人嘅味覺好靠個鼻。如果個鼻俾啲濃烈嘅油煙廢咗武功，食龍肉都冇味。不過整體上嚟講都好滿意。

個芝士肉汁薯條好好味！雖然個肉汁可能係現成野，不過加埋啲溶咗嘅芝士，真係好好味。雖然好鬼滯，我地一條都冇放過！反而個普通薯條就攞咗返屋企。依家仲係個雪櫃入面…

辣肉醬熱狗味道唔錯。我幾鐘意食辣肉醬。好香口，不過又係好滯。食到反肚…

汽水有無限添飲，最啱我呢啲人地出錢我出命嘅人。食得好開心，有機會一定會再嚟！



~ Lindberg