我的第一對 Camper

「郭生，我想買過對鞋。依家對鞋好鬆，隻腳之前拗柴都仲未好番。買乜好？」

「Camper 啦。」

「Ardy，我想買過對鞋。買乜好？」

「Camper 啦。」

「咩係 Camper 呀？」

「Camper 你都唔識，唔係呀嘛？！」

老實講，我對衣著服飾冇乜研究。唔識有乜出奇喎。

之後 Ardy 好好人地帶咗我哩個鄉下佬出『時代廣場』睇鞋。見到個款之後，我就記得見郭生著過咁嘅鞋。試來試去，終於搵到對合眼緣嘅。於是就去俾錢。有折上折都仲要千幾蚊！洗唔洗咁貴呀？

其實講著鞋，我都唔係著過好多牌子。記得細個嘅時候，（印象中仲記得嘅）就係阿媽買 Hush Puppies 俾我著。對於一個母親，覺得對鞋啲皮好軟熟，應該好好著，而且個牌子名幾「友善」，就係一對好鞋。奈何就係個牌子名出事，因為唔夠「威」。當自己大個咗，有能力去選擇同買嘅時候，即使知道佢好著，就會因為覺得佢個名好細路仔，於是就一定唔會買。

中學時代，我地要著啡色鞋。當時興帆船鞋，亦即係 Timberland。當時係好貴嘅一對名牌，我買唔起。有啲同學仲會挑戰校方，著對高筒嘅 Timberland。不過其實俾條校服褲遮住，都唔會俾人捉到嘅。

其次就係 Dr. Martens。亦應該係我自己，跟風去買嘅第一對鞋。Dr. Martens 勝在個底夠耐磨。因為佢好似一層一層嘅關系，我話磨完一層仲有下一層。哈哈哈… Ardy 仲話佢以前打藍球都係著哩一對。勁！印象中，當對鞋唔著得嘅時候，上面啲皮爛晒，個底都冇乜磨損到。

入到大學嘅時候，著乜都得。通常都係一對波鞋出出入入。當時興 K-Swiss，我前後都有兩對。但後來先發覺 Jayson 媽唔鐘意。唔怪之得當時佢唔理我。唉…

但出喺做野之後，唔知點解俾大哥所感染，買一個好「佬」嘅牌子：Florsheim。勝在都係好著。如是者，日日返工都係哩對鞋。

直至有一年，我響應日本推行夏天簡著，夏天就著「夏季校服」返工。短袖衫，米色褲，啡色鞋。於是就由頭到腳都係好似 Aigle 贊助一樣。不過佢啲鞋唔係太好著。我鐘意佢唔洗縛帶，不過好鬆。可能因為咁，我隻左腳一直冇好轉。

Camper 哩對鞋又真係幾好著，個款都唔錯。貴就貴咗啲。我同事見我著，就立即認得出。佢話佢嗰對日著夜著，著咗兩年先穿底。千幾蚊，著兩年，都算係咁啦。不過因為要縛帶，出門口就麻煩啲。唔似以前咁，抱住個仔都著到鞋。有次仲反而太用力穿落去，整親隻未好返嘅左腳。唉…

~ Lindberg