活在第三世界中

前兩日同我大哥 msn。當時十一點幾，我仲覆緊公司少少電郵。佢問我做乜成日咁夜都唔瞓。我話我地要整完 Jayson 啲野、做完家務、洗白白、然後先有得做自己野。邊有咁早有得瞓喎！佢笑我：「活喺第三世界」。咁佢有工人幫手，當然乜都唔洗做啦！

「爸爸阿四，做乜間屋咁亂㗎？！快啲做下野啦！」

有時真係好羨慕喺菲律賓嘅屋企人。雖然唔算係一個好好嘅國家，但係如果係比較富有嘅一群，都可以生活得好舒服。小朋友嘅教育亦冇乜野問題。香港有嘅，佢地都有。而且千祈唔用香港嘅菲傭嚟做標準，嗰邊都有好多靚女㗎！

話雖如此，我都算幾滿意現狀。雖然屋就一定要搬，不過每日家務方面就可以接受。自從有咗家務助理之後，唔洗做我最唔鐘意嘅清潔。因為我有「選擇性潔僻」，一做家務就一定發脾氣。「啲雜誌邊個㗎？！」「邊個又咁冇手尾呀？！」

前一排做野做得好唔開心。其中一個老細日日都愁雲慘霧咁，喺我面前行來行去。哩幾日佢屋企有事，於是要飛番祖家，我先有心機同另一個老細正正經經做啲野。好彩都叫有啲收獲，唔洗死…住。正當唔開心嘅時候，好在有大哥喺網上同我傾下計。

有時覺得做最細嗰個真係幾好。無論自己幾大個人，甚至乎連仔都生埋，都仲可以走番屋企扮細。雖然我同兩個阿哥生活喺唔同嘅環境，三個人都好似，三個都係大唔透。而兩個姐姐就好唔同。姐姐就好姐姐，冇我地咁低能。哈哈哈…



~ Lindberg