愛國情緒的大起大落

近排，除咗個股市經常大起大落之餘，我發現自己愛國嘅熱誠都係大起大落。

幾個月前嘅西藏暴動，令好多人都擔心會唔會有更激烈嘅行動。但北京搞咗個好成功嘅奧運，全世界有目共睹。每一個中國人都好自豪地話俾人聽，中國做得到。

但點知奧運一過，就嚟一個三聚氰胺，令到人心惶惶。自己身為父母，見到啲小朋友有事，都好心痛。而常言道：「你死你賤」，我地犯嘅錯，自己受番咪算囉。點知其他國家都驗到食物因為有用中國嘅奶粉，而受到「污染」。嗰一刻，我為做一個中國人而感到慚愧。

好彩我地不停有好消息，可以「沖喜」一下。神州七號載住我地三個中國太空人，成功太空漫步，安全返回地球。翟志剛喺太空搖住國旗嘅一刻，我對祖國嘅尊敬，又再一次推到頂點。誰知轉個頭就睇到朋友嘅留言：「M&M 都有，勿食！」天呀……

有時都唔係好明啲人諗乜。喺奧運期間，個個都好似斬腳趾避沙蟲一樣，少做少錯，唔做唔錯。兩個奧運，我公司想買一塊中國雞胸都冇得買，因為好多野都唔俾出口。差啲激死我。但好明顯，紙係包唔住火。

無可否認，今次嘅事件可以睇到我國喺化學嘅進步。原來孔雀石綠、蘇丹紅都只不過係小兒科。明明冇諗過會喺食物入面出現嘅三聚氰胺，都可以俾我地諗到佢嘅用途。用水溝稀啲奶，再加三聚氰胺，我覺得就好似街邊啲阿伯用水去浸濕收番嚟嘅紙皮，但求可以賺多一個幾毫。唯一唔同嘅，就係我地唔會放紙皮入口。

我好記得阿托以前同我講過「血酬」一詞。我地中國人每一分、每一毫，可真係「血汗錢」。簡單嚟講，血酬係為咗保存生命願意付出的費用。以暴力（或不法手段）來獲取利潤。係唔係真係要去到咁盡呢？唉…

今日郭生仲同我提到之前嘅假蛋。

「郭生，咁人地日本都有假三文魚籽啦！」

「咁人地嗰啲唔會食死人呀嘛！」

「又係喎…」



~ Lindberg