五十四日環遊美加 之 轉戰拉斯維加斯

基於方便嘅原因，加上未必有能力開長途車，我地參加一個本地旅行團去咗拉斯維加斯。所以我地就暫別洛杉磯，轉戰拉斯維加斯！

喺洛杉磯有好多本地旅行團去拉斯維加斯。有啲 US$1 就可以去到拉斯維加斯。逢周末出發，好明顯就要「捉」你去賭啦。阿 Chow 嘅阿爸阿媽有時都會去玩下。

而我地哩種三日兩夜嘅旅行團，除咗去拉斯維加斯，仲帶我地去大峽谷、倫敦橋、胡佛水壩、同埋去 Outlet 掃貨。如果要新牌車手：鄧生，自己開車去咁多地方，一定好辛苦。所以參加本地團係一個唔錯嘅選擇。

車程非常之長。途中去過幾間快餐廳。我睇我會記一世。

1. 第一次飲凍檸茶。點解唔甜嘅？！仲只係得一塊仔檸檬。我地走去問有冇糖漿，俾人當怪獸咁望住。後來只係俾咗兩包沙糖過我地。當時覺得好奇怪，後來先明白。原來佢地嘅 Iced Tea 真係應該得茶同冰，唔同香港嘅凍檸茶。
2. 第一次食鮮紅色嘅咕嚕肉。我地去到一間中式快餐廳。都唔知食乜好，諗住叫咕嚕肉應該穩陣。點知嚟咗碟「車厘子」紅色嘅咕嚕肉。雖然味道係有酸有甜，但係真係搵鬼（佬）食囉。

經過國家公園嘅入口，然後見到好多好大好大株嘅樹木，終於去到大峽谷。俾我地第一個印象係：好大個窿呀…

真係非常之壯觀。望住一個咁大嘅窿，環境好靜好舒服。同望海嘅感覺差不多。不過我地白痴到嗌睇下有冇回音。可能真係太大嘅關系，冇乜回音。雖然只可以喺上面睇一睇（因為冇錢坐飛機飛落去），然後去隔離間戲院睇個關於大峽谷嘅短片，我地都覺得不枉此行。

喺大峽谷發生咗啲好笑野。洛杉磯有好多台灣人，而阿 Chow 都可以算係半個。所以佢幫我地搵嘅，都係以台灣遊客為主嘅旅行團。咁導遊就當然係講普通話啦。佢同我地講，大峽谷有好多「鬆鼠」，好得意。我地幾個聽唔明佢講乜，四個傻仔討論咗好耐都唔知乜野係「鬆鼠」。後來見到就知啦，原來係「松鼠」。哈哈哈… 白痴！

去到拉斯維加斯，我地先知乜野係花花世界。雖然當時冇依家咁多新賭場酒店，我地已經覺得好靚好勁。有好間賭場酒店嘅門口或者入面商場，都有免費表演睇。最記得喺 Treasure Island 出面有個海盜表演，我地睇到啞咗。真係有海盜同士兵，喺兩架船上面對打，製作非常認真。唔洗俾錢可以睇到啲咁嘅表演，真係好開心。

前後兩晚，住咗兩間拉斯維加斯嘅酒店。晚黑喺自已間賭場嘅酒店玩咗一陣老虎機，我地就上樓沖涼。因為我瞓覺大過天，而且我對賭冇乜興趣，所以我就走咗去瞓。其他三人落樓繼續戰鬥。救命！

過咗第一晚見番佢地。原來佢地差不多玩通宵。拉斯維加斯嘅賭注出奇地細。幾蚊已經有得玩下，唔似得我地澳門咁。而佢地三個竟然花咗一晚嘅時間，去研究一種我地亞洲冇嘅賭博遊戲：Craps。簡單嚟講，即係骰仔。唔同嘅係自己擲。

然後佢地帶著依依不捨嘅心情（因為輸咗錢…），離開拉斯維加斯，繼續我地嘅行程。
其實都已經算做係回程。旅遊車經過倫敦橋、胡佛水壩，來一個走馬看花。細路仔唱嘅：「London Bridge is falling down…」，原來就係哩條倫敦橋。話說原本佢喺倫敦泰晤士河上面，因為不勝負荷，所以公開拍賣下，賣咗嚟美國。

鄧生同我指住嗰部，係安全套自動販賣機。唔洗擔心，我地冇買嚟用。我地四個男仔都非常之純潔。只不過又係好一個鄉下佬出城，乜都影得一餐…

最後去到 Outlet 掃貨。原本好希望買到一對 Timberland 嘅皮鞋。可惜搵唔到。最後大家買咗幾條 Levi's，幾件 Polo 之類。唔算有太多斬獲。

返到洛杉磯，又繼續我地嘅旅程，玩轉洛杉磯啦。



~ Lindberg