Plurk vs Twitter

早前因為 Fred 哥的推介，開始用 Twitter。而近排得一班好網友拉落水，仲用埋 Plurk。其實兩者都係所謂嘅社交網絡（social networking）網上軟件。有啲似簡單版嘅 facebook。兩者都係可以搵下（或者邀請）啲朋友，建立一個小社交網絡。

有啲朋友好抗拒上 facebook，因為驚一開就有幾十件「禮物」送過嚟，覺得好無聊。但我自己就覺得，如果真係收到「禮物 」，咁都證實人緣唔錯呀。同 facebook 唔同，Twitter 同 Plurk 都冇額外軟件或遊戲可以安裝。兩者都只係俾你放一句說話，同其他人分享。一句一句嘅說話就會變成好似一個日誌（journal）咁，而朋友可以回應你任何一句日誌。

用途上其實都幾多變化。正路嚟用，就好似寫一行嘅網誌（blog），同朋友分享即時感受。例如：

「12:54pm 我喺茶餐廳食緊飯。碟飯好難食…」
「1:10pm 對面有個女仔望住我笑。神終於綣顧我啦！」
「1:30pm 原來我冇拉褲鍊！天呀！做乜又玩我？！」

當然做到咁，就好似有啲「露體狂」。「露體」唔係指條褲鍊，而係將自己所有野，都放晒出嚟俾人睇。不過如果掌握得好，就有機會變成一個有趣嘅日誌。但如果要個日誌跟得咁貼，非有部方便上到網嘅電話不可。

除以上嘅例子之外，Twitter 同 Plurk 仲可以做工作日誌，等同事間知道一啲工作進度。亦都可以放啲資訊或網站連結，同朋友分享。某程度上同即時通訊（Instant Messaging，如：MSN）有啲相似，不過就可以俾多啲人睇，同埋之後幾時睇都得。

而 Twitter 同 Plurk 都有各自各嘅長處。Twitter 最好嘅地方，就係同 iPhone 整合得好好。要做到一個有效嘅日誌，可以用到手提電話真係會方便好多。有多個 iPhone 嘅軟件，可以放野上 Twitter。除咗簡單一句文字，仲可以用 iPhone 影相直接放上去。仲可以用 iPhone 嘅 GPS 功能，放自己嘅位置上自己個 Twitter 上面。不過我真係唔知後者有乜用。莫非自己迷途，放自己個位置上 Twitter，然後叫自己嘅朋友上網睇完嚟營救咩？！

而 Plurk 就冇咁好支援。全部都要用瀏覽器上網先搞得。更加冇直接放相上網咁方便。但佢做得好嘅，就係回覆嘅處理。喺 Twitter，新嘅留言或回覆只會放上最頂。好多時都唔知邊個覆邊句。小圈子裡，少人玩都無所謂。但如果人一多，多人回覆就好大鑊。而Plurk 就有一條靚靚嘅時間軸（timeline）。所有回覆都會歸納喺原本嘅留言入面。所以非常清楚，一目了然。試想象一下我班網友，一日一百幾十個留言同回覆（一啲都冇誇張），所以 Plurk 會好好多。

除此之外，Plurk 仲捉到用家嘅需要同心理。首先，佢可以好容易咁插入自己個網誌（我哩到左邊都有個）。啱晒我地一班網民。而且 Plurk 為咗鼓勵人去玩，仲好「乞人憎」地整個分數（Karma）出嚟。你越寫得多就越高分，越邀請得多朋友參加，亦會越高分。高分就可以用到一啲之前用唔到嘅功能，例如改自己個名、多啲心情符號、等等。換句話嚟講，真係好邪惡，迫人日日都要上去！哈哈哈！



~ Lindberg