去當舖食飯

前個星期日約咗 Jayson 契爺契媽出嚟食晏。契媽選擇咗一個好特別嘅地方。我地去咗當舖食飯。

The Pawn
地址：灣仔莊士敦道62號2-3樓
電話：2866 3444

之前其實都經過幾次。哩間由當舖改建而成嘅餐廳，外表非常有特色。但個價錢牌都幾嚇人，所以一直都冇諗過去。有人約到，當然就最好啦。

佢有三層樓。第一層係接待處。第二層係餐廳。頂層係露天公園。周圍都用上好古舊嘅傢俱同裝飾。張張檯都唔同樣，形造咗一個好特別嘅氣氛。啱晒啲老外。

契爺契媽兩個都叫咗炸魚薯條。炸魚炸得好唔錯。塊魚唔會有陣味得嚟，仲炸得好脆。檸檬用塊白布包住，唔會跌啲核出嚟。好有心思。

Jayson 媽叫咗個三文魚。不過不失。

我就勁啦。我叫咗個 Roast Pork Belly。因為掛住餵仔，都冇諗清楚係乜。碟菜一嚟，先發現 Roast Pork Belly 咪即係燒腩肉囉！

個賣相好吸引，不過燒腩肉都係中國人方法好啲。好似佢咁燒法，啲皮好硬。而且因為好油，即使分咗半條俾佢地，我都差啲食唔晒。不過都算做幾有特色同味道唔錯啦。

啲食物好大份。其實四個人叫三碟，加一個頭盤已經好夠。

埋單 $250 一位。一啲都唔平。不過一次半次，食物唔錯時又食得開心，冇所謂啦！

Fred 哥後來同我講，話間野啲食評麻麻，服務態度唔好。回想起來，服務又真係一般。唔似可以收得咁嘅價錢。除咗接待員姐姐比較殷勤之外，侍應同經理都冇乜理過我地。可能我地掛住同 Jayson 玩。亦都可能因為我地只係開咗兩支水，而唔係好似其他人咁開酒、開香檳啦。

而成餐晏食得最開心嗰個係 Jayson。不停對住契爺契媽笑。真係冧死人！

「爸爸，我坐主席位呀！」

「最威係您啦！」

~ Lindberg