五十四日環遊美加 之 玩轉洛杉磯（一）

上次去完拉斯維加斯，我地就返到洛杉磯，誓要玩盡每一個角落。

嚟到洛杉磯，當然要去睇咗佢著名嘅地方先啦。我地首先嚟到阿 Chow 嘅母校：加州大學洛杉磯分校 University of California, Los Angeles（UCLA）參觀一下。校園好大好舒服。可以喺咁嘅環境下讀書，人都醒神好多。

然後我地去咗好萊塢。好萊塢嘅主要街道：好萊塢大道（Hollywood Blvd）兩旁有好多（遊客）店舖，有好多紀念品賣。我地都買咗唔少唔知有乜用嘅手信。

而其中一個重要的地標，係位於好萊塢大道上嘅文氏中國劇院（Mann's Chinese Theatre）。除咗劇院外型特別，佢前面就係著名嘅星光大道。

另一樣洛杉磯最多嘅，就當然係主題公園。上次去咗 Knott's Berry Farm，今次講多兩個地方。
我地先去環球影城（Universal Studio）。喺入影城之前，有好多同電影有關嘅商店，分散我地嘅注意力。當年，影城入面主要有兩樣野玩。

1) Studio Tour：坐住車仔遊影城。都幾好玩㗎。例如行過一個大水池，有條大白鯊走出嚟。

2) 三款機動遊戲。Back to the Future the Ride、ET the Ride、Backdraft。前兩者可能因為太舊，已經冇得玩喇。嚟到美國嘅主題公園，我地修習到耐心等候嘅心法。因為每個遊戲都要排隊超過一個鐘！

第二日，我地自己開車，去咗六旗魔術山（Six Flags Magic Mountain）。Six Flags 係一個我地永遠都唔會唔記得嘅地方。因為佢真係好恐怖㗎！

佢入面啲過山車，真係多到唔信。要乜款，有乜款。張相係一座用木造嘅，雖然只係上上落落，因為係用木造，加埋啲木聲，都幾激㗎。

其中一款叫做 Viper，我地見周圍嘅機動遊戲都排晒隊，而哩個就冇，於是就唔理三七二十一，唔知玩乜嘅情況下就走咗上車。見個樣同普通過山車差不多，心諗應該冇乜特別啫，所以先冇人排隊。誰知原來唔係唔好玩，而係冇人敢玩！

哩部係全個場最恐怖嘅過山車，當時 Viper 係號稱為全世界最大的雲霄飛車，有 360 度旋轉七次。最大嗰個有 14 層樓咁高！死未？！我地一上車都未知死。點知一開始，見架過山車向上爬，爬十世都未到頂。嗰時就知出事，口中不停咁鬧同叫救命，不過一切都已經太遲啦…

當時我地冇攝錄機，但我喺 youtube 搵到以下片段。我專登搵咗一段係有好多粗口嘅，因為同我地當時玩嘅情況一樣。哈哈哈…

對於一個心血少嘅人，可以安全落返車，真係值得飲番杯。雖然係咁恐怖，不過都坐得好舒服。因為場中仲有好多其他過山車，有木造嘅啦，有奇型怪狀嘅啦。有啲真係坐得好唔舒服，坐完仲會頭痛。

佢同華納兄弟（Warner's Brother）唔知有乜關系，入面有好多華納嘅人物。但大家見到大鼻身邊嗰隻 Slyvester，並非係人扮，而係真係公仔一隻。亦都係我地惡夢嘅開始。

話說我地見有灘位遊戲，玩遊戲贏公仔，手痕就走咗去玩。我贏咗隻細細嘅翠兒。大鼻挑戰難度，玩一個類似香港嘅「美國冒險樂園」嘅擲銀仔，中彩虹嘅遊戲。點知都唔知好彩定唔好彩，真係俾佢中咗一隻人咁高嘅 Slyvester！都唔知點攞番香港！但既然中咗，攞番上車先算，之後再入場玩過。

一出到停車場，就發現出事。架車泊咗喺邊呀？！一望無際嘅停車場，之前我地原全冇諗過要記住架車泊喺邊。架老人車又冇遙控防盜，冇得按嚟搵車。我地足足來回行咗個停車場兩次半，先搵得返架車。仲要拖住隻咁大嘅公仔，真係灰到嘔。

下回繼續玩轉洛杉磯。



~ Lindberg