拜訪白雪堡壘

尋日，「一個墟」嘅主要成員，去咗白雪嘅屋企玩。好開心呀！

「爸爸，哩到有好多野玩呀！」

雪姑住喺西貢。去佢屋企比我想象中易好多，而且由馬鞍山入去都好快。一去到，二話不說就開始玩啦！

東道主：Anson。正所謂自己地頭，馬騮仔成日四圍走。勁搞笑。

茄茄真係可愛到爆炸。而且非常叻。一歲人仔，已經識做好多野。犀利！

Mavis 係唯一一個女仔，所以非常珍貴。而且喺一班小朋友面前，佢就好似大姐姐咁。見到佢識咁多野，就好似係我地嘅引路明燈一樣。哈哈哈！

好耐冇見 Eason 啦。比之前見佢再多咗兩分「公子」氣質。引死人啦！

唔好睇少哲哲細細粒，玩起上嚟不知幾叻呀！

最後當然有我地舊飯：Jayson 啦。成日玩「含羞答答」，引死班姑姑。

一班小朋友可以一齊玩真係好好。感覺有啲似 Play Group。可以俾佢地見下「世面」，接觸多啲新事物。就例如 Jayson 唔肯爬，見大家爬得咁開心，都會嘗試一下去爬。

再來一次三神合體！

「一號機 Eason，我俾個波波你呀。」

「一號機、二號機，正經啲啦！我地要合體呀！」

「報告三號機，一號機合體失敗。我地自己玩啦…」

晚餐喺燒烤，雪姑同王子為我地預備咗好多好野食。好好味（多得王子同李錦記），而且食極都仲有。好彩之後仲有 Eason 爸加入戰團，幫我地收拾殘局。

其實玩到一半，我已經好想同阿仔一切瞓，因為同佢地玩，大人差啲仲攰過啲小朋友。不過見大家玩得咁開心，乜野疲倦都唔記得啦！

差啲唔記得。雪姑嘅金毛：福仔，真係好靚好乖呀！但我竟然唔記得搵 Jayson 同佢玩，一齊影番張相。真失敗！

今次仲冇影到大合照添！失敗中嘅失敗。一於十月二十六日再玩過啦！多謝雪姑一家，熱情款待！


~ Lindberg

P.S. 原本我地諗住可以開個水池，俾班小朋友玩下水。可惜天陰陰又涼涼地，所以冇得玩。雖然有啲可惜，不過都玩得好開心。而且如果真係有得玩水，相信班大人玩得仲攰呀。哈哈哈！不過 Jayson 嘅泳裝就好明顯得個「買」字啦！