四大美人 @ 四季食館

打完個標題之後，自己都打咗個冷震。不過我都係跟主辦單位叫。嘻嘻…

尋日同白雪、莎莉、貓奴、Emilili 等人食咗好開心嘅一餐。不過食完之後有啲肚痛。唔關啲食物事，係笑到肚痛啫。

太子四季食館
地址：太子大南街18至22號地下

先講餐飯。湯底係蕃茄薯仔大眼雞湯。個爐係火力強勁嘅煤氣爐，所以打得好暢快。我地叫咗好多野食，牛肉呀、丸呀、豬膶呀、丸呀、雲吞呀、丸呀、菜呀、仲有好幾樣特色野。熟食都有叫，叫咗碟椒鹽九肚魚。又炸得唔錯喎。

起初見到一檯面都係野食，都有啲擔心我地八個人食唔晒。點知慢慢食下食下又食晒喎！厲害厲害！

莎莉好明顯之前食辣食上癮，狂落辣椒落條豉油到。食咗一半自我燃燒，熱到要去更衣。而貓奴有樣學樣，但點知唔小心俾舊辣椒哽嚫，被技術性擊倒（KO）。飲咗一支竹蔗茅筋水先頂得順。亦都好彩佢被擊倒，之後能量大減，否則相信我會被玩得更慘…

白雪繼續挑戰胃抽筋，剛剛放落水嘅野，轉頭就放落口。好彩王子喺到，否則如果發生乜野事，相信我地只會由得佢自生自滅。阿 M 跟我地討論一個好重要嘅人生問題，突然有啲為肥仔哥擔心。哈哈哈…

四個女人，四部相機，不停咁影。阿 M 部 GX200 超好玩。比起 GX100 ，「好玩指數」（或稱：「屁股指數」）高出兩倍有多。用來止痕一流。

談話中，估唔到我篇五十四日環遊美加可以為大家帶來咁多歡樂。可以讓大家嘅快樂建築喺我身上，係我嘅光榮。大家繼續笑啦。

不過間食店有樣唔好，就係太過嘈。嘈到要大聲叫先聽到對面講乜。對於有「選擇性失聰」嘅我，更加乜都聽唔到…

埋單好抵呀！啤酒十蚊一大支。我地唔知飲咗幾多。埋單都係 $110 一個人。食得咁開心，希望好快又有機會一齊玩啦！


~ Lindberg

P.S. 多謝莎莉送俾每位女士嘅小禮物！真係好有心思嘅啫。


P.P.S. 阿 M，我要番妳部相機，我影嘅相！原大呀唔該！