改壞名

尋日媽媽無端端打俾我，問有關我個名嘅問題。

媽媽問我個中文名點寫。幾經辛苦，我終於用我有限嘅福建話教咗佢點寫。多少嘅「少」，「積」係木字上面多一撇，王字穿頂，下面加個貝字。原本可以簡單好多，話積蓄個「積」咪得囉。但奈何我唔識讀個「蓄」字，所以先搞成咁。

為咗確定一下，我用英文同媽媽解釋多一次，即係「Little Savings」。問你死未！其實前一排 Jayson 媽先笑完我個名，唔怪得我冇乜錢淨啦！

媽媽笑完一輪之後，問我唔係仲有個中文名咩。係就係，中學時期有個師傅幫我改咗一個。但個名唔多順口，又要改身份證明文件，仲有機會俾朋友笑，所以都係唔好煩喇。而且依家個名都幾好呀。俾個借口我唔洗儲錢。呵呵呵呵呵…

其實都係剛剛睇咗新朋友：班長個名先令我喺到諗… 唔知名對人嘅性格會有幾多影響呢。
我夠得我地三個仔女啲名都改得唔錯。都係佢地阿媽嘅功勞。

阿威原名係 V 仔，因為佢額頭有個 V 字。叫叫下，就變咗阿威。威威下，有時就變咗「豬威」。

Julie 個名源自佢成日伸係脷出嚟，所以我地叫佢做「豬莉」。

而跟據咁嘅排名方法，Jayson 應該叫做「豬臣」。好彩佢阿媽諗到個好啲嘅名：「浚琛」。如果唔係，阿仔就慘啦，哈哈哈哈…

等 Jayson 大個仔，我地就會知道名對性格有冇影響。「浚琛」，挖寶也。唔知佢會唔會變成Indiana Jones 呢？不過至少有佢爸爸做反面教材，Jayson 都應該留到啲錢嘅。哈哈哈哈…



~ Lindberg