又一間「麥」記

今次係我第二次嚟天后嘅麥兆記。以前同一個位係釗記，起初以為只係另一間普通麵檔頂手，但原來都有啲名堂。麥兆記係奀叔（麥奀記嗰位）嘅次女及女婿另立門户之作。上次一食，覺得非常「離譜」，所以尋日去開嗰頭，忍唔住又去過。

麥兆記（祖傳）廣州雲吞麵
地址：天后電氣道74號B地下

上次我食咗碟水餃撈麵。麵身同其他「麥氏」雲吞麵一樣咁彈牙好食。我好耐冇去過麥奀記，唔記得佢啲麵有幾幼。不過我覺得麥兆記應該幼啲。因為呢到啲麵竟然幼到可以攝牙罅！條條都可以當牙線用。雖然係咁幼，但又不失彈牙可口。而可能地區問題，價錢比其他「麥氏」平一兩成。真係好「離譜」呀！唔食點對得住自己呀？

今次我地叫咗兩個雲吞麵（$22 一碗）、一隻鹹肉粽、一碟芥蘭。今次啲麵失準咗少少，比較生。不過浸一陣都還可以。麵有輕微嘅鹼水味。對於一個平時食雲吞麵要落四分一支浙醋嘅人，喺麥兆記，我一滴都冇落過。

四粒雲吞，一口一粒，非常珍貴。蝦肉新鮮，應該都係八成蝦，兩成肉嘅配搭。湯底好濃，大地魚應該落得好多。相對胡椒粉亦都落得幾重手，所以比較辛口。未必啱一啲人嘅口味。

鹹肉粽有好香粽葉味，味道唔錯。芥蘭可以生少少，我唔鐘意焯得太腍。總括嚟講，份量唔算大，肚餓一定要食多碗，但已經係非常滿足嘅一餐。

~ Lindberg