還神 @ 車公廟

每年，我地一家都會嚟車公廟上香。雖然一年比一年勞氣，但我地都係照嚟，祈求車公爺爺庇佑。

「爸爸，得未呀？」

「未得呀！Jayson 要尊重一下車公爺爺，保佑您身體健康呀！」

之所以一年比一年勞氣，都係因為班廟祝。實在太向錢看，太過屈水。一年比一年多花樣，一年比一年貴。今年阿媽唔認得邊個係舊年幫我地嗰個，就是但搵一個廟祝。當我見到，一睇就知唔係好人。見佢蛇頭鼠眼，真係屈水屈到暈。最後因為我同阿媽堅持話舊年都唔係咁，佢就話唔做我地生意。

後來我認得舊年嗰位伯伯，佢就幫我地還神作福。之後有兩個妹妹仔，搵嗰個蛇鼠廟祝。我當然唔會去聽佢解成點，但我見佢之後不停威嚇佢地買啲靈符。唉… 某程度上我都明嘅。解簽收你幾十蚊，唔屈你買道符，邊到搵到食呀。但因為出法點都唔係真係為咗幫啲善信，所以見到都好唔舒服。

幫我地做法事嘅伯伯好認真，手字超靚。但亦因為咁，足足搞咗我地個幾鐘。Jayson 因為太肚餓，所以就喺車公爺爺地頭開飯。唔知係唔係有車公爺爺睇住，好乖地食晒成個飯！哈哈哈…

去到車公廟，當然要買個風車俾 Jayson 玩下啦。

其實每年去車公廟，我都係志在之後餐午飯。其實來來去去都喺得兩間。以前只會去楓林小館，食碟煎鹹魚。後來 Jayson 媽鐘意去龍華酒店食乳鴿。今年叫番阿媽揀，佢話要去楓林小館。好明顯叫佢自己揀，廁所都覺得香啲。激死… 不過啲野食都好有水準嘅。最好味係個即磨嘅合桃露。好味呀！



~ Lindberg