McCafe 卡嗶千奴

「Hello…我可唔可以請你飲杯「卡嗶千奴」？」

「好呀。」（我飲咗四杯，有四個印仔，所以先送我一杯…）

「味道 O 唔 OK 呀？」

「…」

「如果我話你知佢係 McCafe 嘅「卡嗶千奴」，你信唔信呀？」

「真嘅？（頂！唔怪之得啦…）」

因為金融海潚嘅關系，我一早已經同星巴克斷絕來往。其實早喺好耐以前，同事一句：「嘩！你一杯咖啡夠我食一餐飯啦！」之後，我已經好少飲。但反而有人因為佢有「買十送一」嘅優惠，不停進貢，耐唔耐就整一杯。但我都明嘅，湊仔真係好攰。之前我見陳豪推介，McCafe 嘅 Cappuccino（意大利泡沫咖啡）都只係 $12 一杯，忍唔住去試下。

前後喺唔同嘅 McCafe 飲咗五杯外賣。每飲完一杯，都走去搵郭生（咖啡發燒友）研究：嗰杯邊到係 Cappuccino 呀？

先講咖啡本身，其實味道都算唔錯，有香同味。Jayson 媽話，唔知係唔係因為呢到用維記鮮奶，所以都幾苦，唔及「海神女妖」用寶萊咁甜。其實我話係因為「海神女妖」啲咖啡冇味，成杯奶咁，自然唔洗落糖啦。哈哈…

雖然個咖啡唔錯，但個奶泡真係好唔得。不同嘅咖啡師，對奶泡嘅要求都有唔同，有啲要求細密嘅小氣泡，奶泡堅挺，有啲要求鬆散嘅大氣泡，有泡沬嘅感覺。但作為一杯 Cappuccino，點都應該係有啲泡呱。喺我買嘅五杯之中（其中一杯係送嘅），四杯啲泡都係散晒。

奶泡散晒嘅原因，我覺得都係因為過熱。McCafe 嘅 Cappuccino 好熱，即使放低十分鐘，都好難入口。據聞「熱」係佢地嘅品質要求。但當奶過熱，入面唔蛋白質結構就會分解，奶泡就會好快散。可能再加上外賣搖多幾搖，就變成一灘奶水。依本人嘅口味，我覺得都幾嘔心。

另一方面，奶被蒸氣加熱，入面嘅脂肪會變成糖份，令杯飲品帶甜味。所以一般 Cappuccino 或 Latte（熱奶咖啡），我都唔洗落糖。但如果嚴重過熱，就會有啲似燶嘅苦味。呢個亦都可能係 Jayson 媽飲到苦味嘅原因之一。

飲完送嗰杯之後，好難提起勁再去飲。下次都係飲 McCafe 嘅普通咖啡穩陣啲。



~ Lindberg