北海道親子之旅：戰車三重導航系統篇

返到旭川市火車站，我地就去附近嘅租車公司攞車。喺香港訂嘅時候，原本希望可以喺旭川市攞車，美瑛還。但有咁嘅服務嘅車行，一早俾人租晒。於是唯有喺 Orix 租啦。

我地因為行李多，而且 Jayson 一定要坐嬰兒座，所以要咗架七人車。好幸運地，佢俾咗架豐田 Wish 俾我。夠晒大架！如果俾架同級嘅 Mazada Premacy 俾我，都唔知點放野！

租車手續都好簡單。唯一要留意嘅係如果炒咗車，只要架車死到返嚟，咁就唔洗賠。如果要拖車，就要俾附加費。租四日，大約 HK$3,300，四個大人分都幾化算。而且玩富良野、美瑛呢頭，都係有架車方便好多。鐘意去邊就去邊。

因為日本法例關系，六歲以下小童都需要坐嬰兒座。喺香港，Jayson 現在只係坐 Booster。好彩佢都唔抗拒呢張桶椅。而且坐高啲，亦都可以望遠啲。

GPS（全球定位導航系統）雖然係日文版面，但都非常易用。只要輸入電話或 Map Code，就可以準確帶你到想去嘅地方。如果入 Map Code，最緊要睇下佢出唔出到你想去嘅地方個名。如果唔得，就喺周邊搵下。搵到正確名稱，咁應該唔怕去錯啦。

之後同契爺分開玩之後，佢地租咗架日產 Cube。佢話嗰套 GPS 仲好玩！

架車嘅操控方面，比想象中易好多。雖然我都有 8 年揸車經驗，而且係差不多日日揸，但我好怕揸其他車，尤其是自動波。七人車原來真係唔係大架好多，泊車都好簡單。只係個頭短啲，需要改變一下睇位嘅習慣。而且 Wish 都幾好力，非常穩定，令我揸得好舒服。唯一嘅問題，咪就係自動波囉。隻左腳起初成日放喺一個唔應該嘅位置：手煞車。嚇死我隔離嘅契爺。哈！

以下影片，可以睇到我地點裝行李，同埋套 GPS 系統。

而點解我叫佢做「三重導航系統」？咁係因為當部電腦叫我轉彎嘅時候，Jayson 就會問：「轉邊面呀媽咪？」媽咪答完之後，佢就會話：「Turn left 呀，爸爸。」。當去到路口嘅時候，契爺又會提我多一次。好明顯，佢地好明顯冇留意啲巴士廣告：「行車時，請勿與車長談話。」。但我都會好欣然咁同 Jayson 講一句：「知道啦！唔該晒！」，對契爺講一句：「睇到啦！你當我盲嘅咩？！」哈哈哈…


~ Lindberg

P.S. 當年去希臘玩貓，之後屋企多咗阿威。今次去完北海道，我就多咗…

P.P.S. 但有人好唔鐘意。話好核突。唉…