港童的的後現代生活

工人姐姐已經嚟咗一個半月。我哋要求唔高，又唔洗佢日日煮飯，所以整體上都尚算滿意。而佢喺婆婆到有學煮中國菜，所以每逢星期六晚，我哋都會叫佢試下煮飯。有時佢會煮啲菲律賓菜，都唔錯喎。我問佢做成點，慣唔慣，佢都話可以。有時見佢都會同 Julie 傾計，出咗糧又會買對鞋俾自己，咁即係都識氹下自己啦。希望佢好好地做落去啦…

睇過上一篇嘅回應之後，我發現如果工人唔係喺小朋友出世嘅時候出現，小朋友真係會非常抗拒呢個新家庭成員。

如果姐姐主動去接觸 Jayson，佢會推開姐姐。有時真係一野打埋去。最初幾日，我同姐姐講，係需要時間㗎啦。但即使到咗今時今日，港童都係會出手打人。不停話：「No… No… No…」某程度中，我都唔會怪佢嘅，因為都只係自我保護啫。唔識反而仲驚！

另一方面，為培育 Jayson 成為進一步嘅港童，當姐姐獨自陪 Jayson 食飯嘅時候，我見佢會試都唔試就餵。我覺得佢並非係懶，而只係想同 Jayson 建立好啲啲關系。但當然俾我鬧啦。
提起食飯，Jayson 真係越嚟越懶。有次掛住玩唔願自己食，激到我拍檯！幾驚我嘅「大力金鋼掌」會震碎張檯，到時都唔知點賠番俾公公…。但嫲嫲同婆婆都話：餵啦。等佢食多啲，而且唔好成日搞到佢唔開心啦。諗深一層，我九成九係俾人餵大。Jayson 表姐亦都係俾人餵大。依家我哋咪又係好地地。但我覺得唔係會唔會自己食飯嘅問題，而係依賴心嘅問題。唉…

最近大病過後，港童胃口奇差。一粒米要食三餐。八安士奶都飲唔晒。佢話：唔甜！！！一定係啲「甜甜（藥水）」作怪。莫講話我要拍檯，Jayson 媽都已經到咗佢容忍嘅極限。過咗呢個臨界點，相信有人會好大鑊。而嗰個人相信會係……我。唉…

開咗學之後，我哋依家每日嘅安排係咁：一早大家一齊出門口返學返工。我帶返學，姐姐留喺屋企清潔。中午十二點放學，校車去到婆婆屋企附近。因為我公司好近婆婆屋企，我可以同姐姐一齊去接 Jayson。港童有時唔願行，要我一路抱上樓。行十五分鐘，又上山，又行幾層樓梯，太陽又曬，起初真係要咗我半條命。但後來行慣咗先覺得好啲。

陪港童食一半飯之後，我就要返工。通常過一陣，Jayson 就喊住要瞓覺。婆婆大約五點鐘返到屋企，姐姐會幫 Jayson 洗白白。夜晚姐姐幫婆婆煮飯。大家食完飯，等姐姐幫手洗完碗就返屋企。因為返到屋企唔會再飲奶，所以可以早少少瞓。但有時都會搞到十一點先瞓得著。成晚都喊話呢到痕，嗰到痕。最後搽到成身都係俄羅立英先肯收聲。激死…

就係咁，每一日都好充實地過。



~ Lindberg