北海道親子之旅：親子樂園篇 大橋車厘子園

大橋車厘子園
地址：079-1371 北海道蘆別市上蘆別469番地
網址：http://www.oh-cherry.com/
營業時間：7月中旬～8月下旬　8：30～18：00 采摘季節期間不休。
入園費：大人1000日圓～，小學生700日圓，兒童400日圓。

果園離富良野市大約半個小時車程。泊好車之後，見到一望無際嘅櫻桃田。據稱呢到種植咗30種，合計1,500棵果樹！大約港幣一百可以任食，果王浚琛仲要唔洗錢，希望我地可以回本啦！

行到門口，我地見到個牌。加多500日圓可以到種咗南陽種嘅果園。依常人嘅心態，當然俾啦！

原來去南陽果園，係要坐車。開頂車經過一啲櫻桃樹底，櫻桃低到觸手可及，都幾刺激㗎！（左邊有人興奮到傻咗。右邊有人眼瞓到瞓咗…）

去到之後，有個伯伯好熱情咁招呼我地落車。佢叫我地隨便食，食完啲核就隨便吐落地。可以食得咁豪爽，真係第一次！呢到仲有啲竹蓆，俾我哋坐低開餐都仲得！唔夠高採的話，周圍都係堅固嘅木梯，任用！

但我哋發現果樹真係唔高。有啲矮到 Jayson 都拈到。

老人家或者小朋友都可以享用得到。櫻桃上面有些少灰塵。我隨便抹一抹，就俾 Jayson 食。

經我哋大量食用之後都冇肚痛，所以證實可供安全食用！哈！而最開心嘅係… Jayson 學識咗吐核。

我哋五個人分頭左試右試，試到好食就叫其他人嚟掃咗棵果樹。

呢到真係有好多唔同品種嘅櫻桃。

雖然可以不停咁食，但運動量都幾大。果園依山而建，行去另一個果園又要行上行落，都好攰㗎。

之前都唔知原來櫻桃樹係咁嘅樣，仲要生得咁鬼多！

契爺爬高搵啲靚嘅嚟食。但其實呢…

啲櫻桃唔係好甜。香港食到嘅美國車厘子甜好多！我估靚嘅都俾佢哋摘咗去賣啦，邊輪得到我地任食喎。但可能亦因為冇雪凍嘅關系，所以冇咁爽甜。但對於果王浚琛，真係食得是福！

我地去嘅時候，最甜係呢一種：櫻香錦。唔洗加錢都食到。哈！

雖然唔算食到好好味嘅櫻桃，但可以好開心咁玩半個下午，都不失為一個唔錯嘅活動。去佢嘅中文版網站，仲可以印出優惠券添：

http://www.oh-cherry.com/foreign/zh_tw/zh_tw.html

~ Lindberg