北海道親子之旅：民宿篇 薫風舎（一）

薫風舎
地址：071-0236 北海道上川郡美瑛町字美沢共生
電話：+81-166-92-0992
網址：http://www.biei.com/kumpusha/index.html

當衛星導航話我地到咗嘅時候，其實大家都幾迷惘。天色漸暗，前面一大條沙石路，左右都係農田。都唔見有咩建築物。原來，入口就喺我地嘅左手邊，門牌真係難睇咗少少。

見到民宿嘅外觀，「嘩！」一聲叫咗出嚟。感覺好舒服，舒服到好似將一切嘅煩惱，都經已喺門牌之前放低晒。深呼吸一啖，盡是田園嘅香氣。入門口不禁要講一句：「ただいま（我返嚟啦）。」

聽過民宿主人嘅簡單介紹之後，我地就上二樓嘅睡房安頓一下。

西洋式睡房，房間入面冇廁所，只有洗面盤一個，而且冇冷氣。雖然有啲唔慣，但問題都不大。而且咁近大自然，又係民宿，都係簡單啲好嘅。但契爺最怕熱，得把風扇，原先都驚佢會頂唔順。好在北海道夜間嘅天氣都只得十幾度，據聞佢凍到要起身關風扇。哈哈…

契爺間房係三人房。呢到有兩張床位。

上面仲有張。適合一家三口嚟住。Jayson 見到條咁嘅樓梯，不停話要瞓呢邊，捉住契媽同佢行上行落。唉…

之後就已經係晚餐時間。入到飯廳，立即埋位。背景音樂係輕爵士樂，非常舒服。四周有十幾人，淺笑輕談。雖然同佢地互不相識，但就好似一大家人食飯一樣。（下面張相，好明顯係想影後面嘅女仔，但對焦錯咗落契爺到…）

其實起初我唔知食乜，後來先知係法式料理。食完之後簡直感動到流淚！

Ratatouille Garlic Toast：有睇過《五星級大鼠》嘅朋友，對 Ratatouille 應該唔陌生。冰凍嘅燉雜菜配上蒜蓉多士，感覺好清新。

對於剛剛舟車勞頓嘅我地，冰涼嘅感覺，加上酸甜嘅口味，真係一個好好嘅開胃菜。

Quiche Lorraine：法式芝士煙肉批。一個好「早餐」嘅食品，因為有雞蛋同煙肉。中間啲蛋醬有打過，所以好鬆軟，唔會太過滯。契媽食到讚不絕口，相信同其他人比，呢到真係做得唔錯。

Asparagus Cold Cream Soup：凍忌廉蘆筍。

睇下 Jayson 咁主動自己飲，就知好唔好味啦！

但我覺得奶咗啲，可能係北海道奶嘅關系。我會落多兩粒鹽，先會似番啲係個湯。不過當佢配上新鮮焗製嘅麵包，我已經冇說話好講。

Smoke Salmon Salad：煙三文魚沙律，好難整得唔好。加上煙三文魚本身幾靚，飲完一個淡味凍湯之後，來一個濃味沙律，感覺好唔錯。

食到開始悶悶地嘅 Jayson，開始玩檯面嘅餐具。見只係幾隻狗仔，玩下都冇防啦。

配菜嚟咗個糙米，好有健康嘅感覺。再送上一籃麵包，嚟幾多，契爺同我就殺幾多！

大人食到興起，但可惜小朋友唔多識欣賞。

「爸爸，我要影相…」

冇咩好做，唯有俾佢影下相啦！

Pork Stew with Prune：西梅炆豬肉。諗起都流口水！酸酸地嘅西梅乾，炆到啲豬肉好嫩。就好似我地嘅東坡肉一樣，但唔乾唔硬。好好味！我地原本都已經食到好飽，但轉個眼，啲糙米同麵包都被我地掃晒！強！

Strawberry Sherbet：士多啤梨雪葩，似係用新鮮士多啤梨自己做嘅。好唔好味…？

見 Jayson 好味到要幫忙洗碟就知啦！

最後來一杯香濃嘅咖啡。喺咁嘅環境，一家人可以如此享受一頓咁豐富嘅晚餐，真係可以話夫復何求。

（待續…）



~ Lindberg