北海道親子之旅：民宿篇 薫風舎（二）

食飽飯先有機會好好咁睇下啲地方。飯廳有四張大檯，大約可以坐二十人。

（警告：本篇文章含有裸露照片。但兒童適宜。）

客廳有幾張好舒服嘅椅，一大套音響設備。

左邊有大量唱片。

右邊有大量書籍。

坐喺到聽歌睇書，真係人生一大樂事。

四周嘅擺設，可以睇得出民宿主人嘅心思，同埋對自己地方嘅熱愛。

百厭嘅 Jayson，就攞啲擺設嚟玩「排隊隊」。但又好難怪得佢。俾著我係佢，見到咁多一粒粒，我都會忍唔住手。好彩冇整爛人地啲野！

屋外嘅月色好靚。冇腳架，可以用部 PEN 影成咁都算收貨…

放部機喺檯面，竟然仲俾我影到好多星星！

我地見浴室冇人用，於是就走去沖涼先！民宿有兩個大浴室，可以一家人一齊入去沖涼。

趁 Jayson 仲細，可以同佢一齊洗白白，真係好開心。（放心，以下照片已經經過處理。）

仲有個日式大浴缸，可以沖乾淨身之後，落去浸一浸。日本人真係識得享受！

玩咗成日，一覺瞓到大天光…

房間雖然冇廁所，但有個面盤都方便梳洗。

大家梳洗完之後，就興奮地走落飯廳，去享用我地嘅早餐。但睇契爺個樣，好明顯係未瞓醒…

唔洗用眼睇，用鼻聞都知道有新鮮焗嘅麵包。

簡簡單單嘅一份早餐，已經覺得好幸福。

Jayson 雖然冇乜胃口，但都食咗個包。

「啲包包搽牛油好味呀嘛！」

而我同 Jayson 媽又點少得一杯（又一杯）嘅香濃咖啡呀。

之後我地就乜都唔放過，四圍狂影！

入面影得七七八八，就上樓執野。出去繼續影！

出到外面，好感受到田園嘅氣息。因為早一晚嚟已經差不多天黑，冇睇真四周嘅環境。原來好靚，好得意。

旁邊有塊田，見到種咗好多唔同嘅蔬果。

青瓜呀！莫非佢地將會成為當晚嘅菜式？！當諗起呢一點，就對之前一晚嘅晚餐，更加懷有感激之心。

多大塊粟米田呀！

前一晚，我地就喺呢個位影月亮星星。坐喺到望住一大片粟米田，感覺好悠閑。

屋後仲有好多聖誕樹。唔知冬天嚟，鋪滿白雪，會係一個乜野景象呢？

喺一個咁舒適嘅環境同美食之下，真係有啲唔捨得走。

但鬼叫我未中六合彩咩！唯有繼續我地嘅行程啦…

~ Lindberg