五十四日環遊美加 之 回歸祖家

離開咗加拿大多倫多之後，我哋返到旅程嘅起點：洛杉磯。又住番同一間汽車酒店，睇住同一堆二十四小時免費放送嘅「精彩電視節目」…。

返嚟洛杉磯嘅原因，係之前遊西岸嘅時候，放低咗部份物資及手信喺阿 Chow 屋企。咁就當然要返嚟攞番。而且飛返香港，係唔係都要經呢邊㗎啦。

我哋見仲有一日嘅時間，於是就揸車去咗好萊塢（Hollywood），近距離同「Hollywood」塊牌影張相。同參觀一下比華利山（Beverly Hills）係一個乜野地方。睇完之後，只可以「哦」咗一聲。

最後嘅晚餐，我哋決定要頃家蕩產豪一晚！阿 Chow 搵咗一間牛扒餐廳，開咗支不知名嘅香檳，食番餐勁嘅！作為我哋「五十四日環遊美加之旅」嘅完美結局。

如果有用心睇過我呢次旅行日誌嘅朋友，應該記得喺好早段，我哋喺六旗魔術山（Six Flags Magic Mountain）贏咗一隻人咁高嘅 Slyvester。

有網友問過點樣處置。我哋當然無放棄到佢！咁難得中到隻咁嘅野，點都要帶番香港，俾啲街坊見識下。但奈何咁大隻，我哋又冇錢買多個機位俾佢，點好呢？

最後唔知邊個諗到條妙計。就係：「放血」！我哋摸到公仔入面應該係啲粒粒。於是就係佢最唔起眼嘅地方：胳肋底，開咗個小孔。原來入面都係啲好細嘅發泡膠粒。我哋慢慢幫佢放血，放咗大概一個超市膠袋嘅粒粒。然後就將 Slyvester 頭向腳對摺，用啲鹹水草紮實。最後放入垃圾膠袋，就帶佢返香港。（我曾經提議過阿托，索性放晒啲粒粒出嚟，得番層皮掛喺個客廳到，必定型爆！但佢當然唔肯啦。返到香港，阿托都唔洗吹番啲粒粒入去。輕輕拍鬆隻公仔，Slyvester 已經可以企得番起身。）

返到嚟啟德機場，大家都鬆一口氣，好有完成壯舉嘅感覺。一生人之中，真係冇乜機會可以有多過一次咁嘅經歷。好高興可以同三位兄弟一齊去一個咁遙遠嘅地方，一齊生活咗差不多兩個月。呢個旅程真係令我哋非常懷念。而且仲要感激一班喺旅途中接濟過我哋嘅親友。我好相信冇咗佢哋，呢個旅程一定唔會咁精彩。大恩不言謝，希望以後有機會再一齊玩過！

（完）



~ Lindberg