五十四日環遊美加 之 終極加油站：多倫多

離開紐約之後，我地繼續北上，去到另一個國家：加拿大。去多倫多嘅主要目的當然係探望好兄弟：阿殘。

阿殘喺我地中六後期，已經去咗多倫多讀書。我地四個專程去探佢，當然係住佢嘅，食佢嘅啦。呵呵呵呵呵呵… 當年佢住喺士嘉堡（Scarborough），環境非常之好。雖然五個男仔瞓埋同一間屋，但比起之前嘅旅館，真係有天國同地獄嘅分別！

去到多倫多，因為有阿殘帶路嘅關系，我地做咗好多之前旅程冇試過嘅野。為咗展示一下我地嘅藝術情操，我地首先去咗睇場《Phantom of the Opera》。第一次睇音樂劇，覺得好新鮮。但因為大攰，睇睇下瞓咗…一陣。

之後為咗要觀摩一下西洋嘅運動，所以我地去咗睇 Blue Jay 打棒球。起初好興奮，果然之後悶到瞓著…

喺多倫多，除咗阿殘之外，我地仲有把朋友。有一日，我地另一位中學同學，帶我地去咗一個湖釣魚。

湖水好清晰，差不多可以見底。目的係釣鱸魚。其實當時我地都唔知乜野係 Sea Bass，朋友話係類似石班嘅淡水魚。啲魚好易上釣，但大半都係啲奇怪嘅魚，我地都一一放番落去。當日，我釣到最大條嘅鱸魚。之後就返朋友屋企，俾佢媽媽蒸嚟大家食。好味！

提起食，多倫多真係可算係我地嘅終極加油站。之前冇啖好食，大家都瘦晒。呢到有阿殘接濟，住就已經唔洗俾錢。除咗啲野食唔貴之外，亦都好合我地脾胃。地道港式飲茶、粥粉麵飯、韓燒仲有新鮮三文魚燒！而且我契媽都喺多倫多，又請我地食飯。真係肥過肥仔啦…

去到朋友嘅地頭，當然要參觀一下佢嘅學校：University of Toronto。但我地已經對咁大嘅校園有啲麻木。

整個旅程，都好似同啲遊樂場不唔開。呢個大概係 Wonderland 呱… 已經冇乜印象。始終去過「六旗魔術山（Six Flags Magic Mountain）」之後，其他樂園都好似好小兒科。

我地仲走去學啲高尚嘅運動：打高爾夫球。但運動對於我嚟講… 學咗就算喇。

稱得上係「加油站」，我地都放咗好多時間喺多倫多。雖然食住都唔洗乜野錢，但我地受損友（阿殘）影響，染上咗個壞嗜好，搞到我地（尤其是阿托同我）洗凸晒。佢就係 Magic The Gathering（MTG）。MTG 都算係遊戲卡嘅始祖。當時出到第四代，賣到斷晒市。之後出多八代，應該仲出緊。損友教識我地點玩，然後帶我地去抽卡買卡。平嘅特別卡，加紙一兩蚊一張。貴嘅…唉…唔好提。一副可以對戰嘅牌，要六十張卡。要打得贏人，都要落唔少本錢同埋心機。返到香港之後，我毒害咗一兩個大學同學。之後，佢地就人間消失咗喇… 我有諗過第二時攞嚟同 Jayson 玩，或者到時會好值錢呢！呵呵呵呵呵呵…

下一站，多倫多的南下北上



~ Lindberg