超隱蔽的星座冰室

呢間冰室，如果唔係 Jayson 媽話有人教點去，我自己一定搵唔到！

星座冰室
地址：尖沙咀金巴利道16-20號香檳大廈地庫36號舖

View Larger Map
如上圖示，喺加拿分道嘅「協勤電業」呢個入口走落去，雖然係隱蔽啲，但應該係最直接嘅方法。

冰室雖然好舊，暗暗黑黑，但地方都好清潔舒服。

據聞呢到嘅「蛋撈蕃茄麵」最出名，但聽過 Jayson 媽同事點樣形容上面嗰灘蛋醬之後，我冇勇氣去叫。所以都係叫碗「炒蛋番茄牛肉通粉」比較安全。因為當時好熱，我要咗杯大檸樂，Jayson 媽就要凍奶茶。爽呀…

依家好多茶餐廳都有番茄湯底。但我覺得唔係間間做得好。有啲所謂出名嘅，一食落口就有一大陣罐頭味，令人非常沮喪。呢間用清（雞）湯做湯底，面頭嘅鮮番茄醬做得好有誠意。炒蛋炒到滑脟脟，令到成碗粉都非常完美。

最後因為有少少唔夠飽（喉），所以叫多咗件奶油多士做甜品。食完就真係照滿足喇！

~ Lindberg