如何培養孩子的責任感

每年幼稚園家教會嘅周年大會，都會跟一個講座。目的當然係吸引家長嚟開會啦。今年又請到理盧幼慈教授嚟主講。舊年 Jayson 媽聽得好開心，所以今年叫我去聽。今次嘅題目係：《如何培養孩子的積極性和責任感》。

雖然周年大會一般都係幾悶，但見到一班家長好落力咁為學校同小朋友做啲事，都好值得鼓勵支持一下。唔講唔知，原來一年佢哋搞成四十幾個活動。差不多每個星期都有野玩！真係好好心機。

完會之後，終於見到理教授。佢攞咗一大堆道具出嚟，擺好個陣就開始講。如果黃茵似黃子華，理教授應該似蘇施黃（語氣方面）。哈！

講座比較似一個分享會，氣氛好好。講咗冇耐，佢問：「大家想唔想小朋友第二時孝順自己？」在場所有人當然狂點頭。之後佢問：「大家又有冇將呢個期望話俾個小朋友聽呢？」所有人都冇出聲。佢話：「唔講佢又點識呢？！」係喎…

其實我都有幫 Jayson 洗腦。我成日同佢講，公公婆婆湊佢好辛苦  ，第二時一定要孝順佢哋。亦同佢話媽咪好錫佢，第二時唔孝順我都要孝順阿媽。但何謂之「孝順」呢？原來我冇解釋過。大鑊…！

理教授話要善用後果。例如如果小朋友同大人分享一粒提子，或者幫大人攞拖鞋，通常我哋會讚佢一句：「乖」。但就咁一個字係唔夠㗎。乜都係「乖」，再「乖」就冇意思喇。其實呢個正係同小朋友建立價值觀嘅好時機。應該讚佢：「您真係孝順喇！」理教授話喺心理學中，要重複呢個「動作」二十一次。佢就會明白何謂之孝順。但當然唔係話佢俾一粒提子你，你就狂讚佢二十一次「孝順」啦！

而父母首先要有啲必具嘅條件，例如：以身作則、言行合一、恩威並施等。其實都係做父母嘅常識。但佢好堅持「尊師重道」呢四個字。佢話唔識的話，啲小朋友就唔會聽大人嘅說話。我諗咗好耐…「尊師重道」係中國人嘅傳統，外國人係咁嘅咩（理教授喺美國工作）？同阿仔做朋友，係唔係一定唔會聽我嘅意見呢？我依家諗通咗喇。重點係「尊重」兩個字。
有咗呢啲基本條件，就可以「開工」。為咗培育小朋友有一個積極嘅處事方法，佢建議用時間表同獎勵制度。而建立責任感，最好就由家務做起。喺依家嘅家庭，好多野都有工人代勞。亦都可能因為咁，日常可以用嚟建立價值觀嘅野都冇埋。

我記得曾經跟郭先生討論過。佢問點解要由我哋啲大人灌輸啲價值觀俾小朋友。我同意每個人都應該有自己嘅睇法，但處身於一個群體嘅社會，大家就應該有一啲共同嘅基本價值觀。前一排有個年青朋友嘅細佬犯咗一件非常嚴重嘅事。講完一大輪之後，原來佢都唔知自己衰乜。只顧自己嘅感受，而唔識點樣先會得到別人嘅原諒。而更令我奇怪嘅係，我個朋友都係唔多明。不得不承認嘅係價值觀應該係隨時代改變，但係佢變之前，我哋係有責任教導下一代。

簡單嘅家務，例如擺碗筷、餵貓狗等，小朋友一定能夠勝任。二十一次嘅「您真係有責任感喇！」就可以由此建立而成。好多時，小朋友都會缺乏專注力，做到一半就走咗去玩。如果係咁，叫個小朋友自己番嚟睇一睇，睇下有乜做漏咗。從而慢慢建立應有嘅價值觀。

有家長問到，獎勵制度會唔會好功利。搞到啲小朋友只會為咗啲獎勵而做野。理教授冇正面回答。但佢好好笑咁講，如果小朋友嚟佢面前，要求獎勵，佢會話：你係乞兒咩？乞兒先會乞求獎勵喎。哈哈哈… 如果冇獎勵就唔會付出，咁即係根本冇責任心。

而講咗咁多，最重要係可唔可行。Jayson 唔知點解好唔鐘意洗手。前兩日，佢用手食野，之後又嘔又肚痛。於是我哋就順勢歸疚於冇洗手。

「我唔洗手！」（設計圖片）

因為試過肚痛，知衰，開始願意去洗手。我哋立即打蛇隨棍上，當佢乖乖走去洗手嘅時候，我冇再隨隨便便贊佢「叻」，我贊佢：「Jayson，您真係衛生啦！」之後兩日，每當我入到位，我就會話佢「衛生」或「唔衛生」。而佢又真係繼續乖乖地去洗手喎。雖然今日唔算太過合作，但我相信只要有耐性，講夠二十一次之後，我就會成功得道㗎喇！呵呵呵…

短短一個鐘頭裡面，佢仲講咗好多「對付」小朋友嘅方法。道具中，佢有一個鬧鐘。如果小朋友鬧情緒，佢會問：「您今年幾多歲？」「三歲」「三歲？咁我哋冷靜三分鐘啦。」調校好鬧鐘，大家就可以享受三分鐘嘅安靜，之後先講道理。做法看似好簡單，又或者好兒嬉，但其實裡面所包含嘅心理學原理好奧妙。今次真係獲益良多！



~ Lindberg