當我哋去完旅行返到屋企嗰晚，Julie 都表現得好正常，只係有幾聲投訴。工人姐姐話佢都食好多嘢，所以都好放心。點知到夜少少，當 Jayson 媽喺廚房行出嚟嘅時候，Julie 喺佢面前發出幾聲怪叫。之後就出唔到聲，呼吸變得好重。吸嗰下好似要好用力咁，呼就好快。因為已經係夜深，而且見佢都幾精神，又唔似有痛，所以只好搵定獸醫診所，第二朝帶佢去睇。
第二朝，Julie 嘅呼吸又正常番喎！把聲都係有啲沙啞，但已經冇尋晚嚇人嘅情況。
再問清楚姐姐，佢先話 Julie 前幾日都有幾聲乞嚏。貓打乞嚏其實都好正常，但為求安心，即使 Julie 有幾唔鐘意出街，都係全家總動員帶佢俾醫生睇下。
獸醫喺嫲嫲屋企對面，並唔係阿威之前睇嗰個。一來唔係好想去阿威嗰間（並非醫生嘅問題），二來呢間有多幾個醫生輪班。假期都有得睇。
醫生檢查一大輪之後，都冇乜發現。為咗以防萬一，仲捉咗 Julie 去照肺！真係嚇死個陰功女。到咗最後，都係唔知乜事。個肺入面都好乾淨，唯一係擔心細個嘅時候，中過嘅病毒唔清，當環境有乜轉變，抵抗力差就走出嚟。醫生摸過之後，話佢喉嚨入面係有啲唔舒服，又為咗以防萬一，要食干擾素同抗生素。女醫生問我餵藥有冇問題，我好神氣咁話，餵藥係我強項。點知干擾素係藥水，最憎餵藥水！唉…
食咗幾日藥之後，都見 Julie 一切正常。胃口普通，但又唔算太差。不過十日藥點都要食哂。唉… 真係俾佢嚇死！下次如果有乜事（touch wood），真係要搵電話影低佢。當然最好乜事都冇，Julie 長命百歲，身體健康就乜都得！！！
~ Lindberg
真係嚇c.
回覆刪除Julie長命百歲!!!
回覆刪除長命百歲！！！
果時烏冬成日會無啦啦扯蝦，醫生又係唔明要我地拍片，希望julie長命百歲！
回覆刪除
回覆刪除希望福仔都一樣，長命百歲！