聖誕大餐 2011

今年嘅聖誕大餐跟舊年一樣，約咗 Jayson 契爺一班朋友上嚟玩。除咗想食火雞之外，因為過咗今年之後，就唔知再有冇機會一齊開派對。但唔好誤會，同 2012 世界沒日無關。只係飯廳會放一座鋼琴，所以到時就冇咁多地方啦。

舊年我用我嘅方法去慢燒隻火雞。因為知道 Jayson 契媽有獨門秘方，所以誠邀佢蒞主理。

除咗火雞，我準備咗一個簡單嘅沙律及風乾黑毛豬做頭盆。然後用美國安格斯肉眼扒攪碎，做咗一個肉醬用來伴意粉。仲有美國牛肋骨肉做嘅咖哩。

不過因為掛住同契爺打機，一個不留神就煲燶咗啲咖哩！雖然好彩救得番，但都多咗少少燶味。但朋友們反而覺得更有風味喎…

焗雜菜用咗荷蘭白蘿蔔。衰在又係焗燶咗啲，否則就更完美。

契媽整火雞果然有一手，皮脆肉多汁。而佢整嘅火雞餡料仲非常非常好味！契爺堅持話係佢切野嘅功勞…

「大家食唔哂就唔好指意可以行得出呢個門口！」十二個大人，好努力咁食…

食到一半，朋友嘅一對孖仔就去咗我哋張床上面瞓。雖然覺得好搞笑，但都感受到湊一對孖仔嘅辛苦。Elma 姑姑，加油呀！

甜品係朱古力布朗尼及蘋果提子麵包布甸。布朗尼係買現成粉開嘅，出奇地好味！朋友仲要求打包走。

開埋支香檳，咁就係一頓完美嘅聖誕大餐。希望來年仲有機會大家一齊玩啦！

~ Lindberg