越南咖啡

今年到 Jayson 舅父屋企拜年，有一個意外嘅收穫。之前有人送咗一套越南咖啡套裝俾佢，因為佢哋少飲咖啡，所以「名劍贈烈士」，轉送咗俾我哋。有新玩具，當然興奮啦！多謝舅父！

經過多次測試及網上研究之後，沖法其實都好簡單：

1. 放20克左右嘅咖啡粉落個濾壼入面，輕輕撴一撴。
2. 再放個圓形壓板上去，輕輕壓一壓。
3. 咖啡杯要用滾水去沖洗預熱。呢個步驟好重要，唔係杯咖啡沖出嚟會好凍。加大約一湯匙嘅煉奶入咖啡杯，然後放濾杯連底碟上去。
4. 倒大約 20ml 嘅滾水落去濾壼，等啲咖啡粉可以好好吸收水份。呢個步驟更加重要！唔係就唔夠咖啡味。
5. 之後就倒多 45ml 嘅滾水（即係倒到上濾壼邊）。冚蓋保溫，等大約五分鐘就會漏完。

濾壼嘅小孔配合底碟嘅小孔，令到咖啡粉唔會跌落個杯入面。因此唔需要濾紙，非常環保！一邊沖越南咖啡，一邊念住唯一識嗰幾句越南話，感覺特別有風味…

「北漏杜拉，木剪塞眛，夜團印越喃，打奪執行大含禁…」

相比一杯意式咖啡，越南咖啡真係濃烈好多。咖啡粉豆被磨得好幼細，跟熱水接觸五分鐘咁耐，乜嘢咖啡因都沖哂出嚟。經「人體測試」之後，精神力提高超過三倍有多（唔好問我點測試）。

加上舅父呢包咖啡味道非常唔錯。我覺得帶有少少椰子嘅香味。但唔知係因為啲煉奶，或者係過濾器嘅關系，咖啡飲落口嘅感覺有啲啲稠，滑得嚟又好似粉粉哋。而且真係濃得好緊要，唔係每個人都接受得到。可能落一半嘅咖啡粉其實都已經夠。但我就係最鐘呢種獨特嘅異國風味。好適合一個懶洋洋嘅下午，慢慢滴一杯，享受一刻咖啡時光。



~ Lindberg