我好鐘意架 Civic。雖然十幾年車，不過保養得好好，真係好好揸，而且係紅色。所以打死都唔換（而且無錢！）。佢係我做車房嘅親戚幫我搵嘅。記得出車嗰陣，我只得四日牌。出到架手波 Civic 都算係咁。不過第一年保費痴筋地貴。
每年我親戚都會幫我驗車。有一年見支避震漏油，佢又見我都想「玩野」，所以換咗四支硬避震、low 低架車、加頂 bar、同換死氣喉。開頭嗰四支二手野唔係好得，再換四支。換咗之後第一次揸已經發現好大分別。硬避震真係好鬼震呀！但係好好揸。好貼地，同埋轉彎好定。
但係最近都係決心做返個乖仔（而且真係好鬼震！骨頭都震裂！），叫人換返四支新嘅原廠避震。今日見到細威，原來已經換咗。當堂高返三寸有多！
架車真係定返好多。雖然只係三幾寸，感覺高咗好多。因為我無乜揸過其他車，所以無得比較。行車雖然舒服好多，但係好明顯入彎無咁好。因為個重心高咗，個人有被拋出去嘅感覺。加上唔係好似以前支硬避震咁，可以感受到地面每一寸起伏，依家感覺唔到個地面情況，所以唔敢揸快。走山路亦有啲唔慣。需要時間去習慣。
原本想揸入石澳跑個圈，試下架車。不過無乜精神，行到半路就打道回府。
~ Lindberg
沒有留言:
張貼留言