我們的表弟

尋晚同表弟食飯。表弟帶咗 Jayson 個表弟出嚟。今次係我地第一次見面。

「表弟，你幾大呀？」

「三個月。」

「乜三個月食得你咁大件呀？！」

我依家更加相信只要越「粗暴」對待小朋友，小朋友就越硬淨。而且小朋友嘅「兼容性」都幾高。有個朋友個女，一歲幾嘅時候，因為要外出，唔帶奶粉奶樽，就俾佢飲維他奶。一樣冇問題！Jayson 表弟只不過係三個月，但我覺得已經有四五個月嘅「硬淨度」。大人嘅食物都會俾佢試下。不過喺我地眼前就冇放入口，只係喺口唇邊試下試下。

不過唔知係唔係因為咁，Jayson 表弟啲皮膚唔係咁好。好多一粒粒。

我覺得我地對於 Jayson 嘅飲食及紀律著緊程度係比一般人高啲。所以見到幫手湊 Jayson 表弟嘅姨姨咁樣做，我地一定會爆血管。先幾日婆婆先俾 Jayson 媽鬧咗一大輪，原因只不過係 Jayson 唔肯食自己啲飯，婆婆驚佢肚餓，就俾咗我地啲白飯佢食。適當嘅時候做適當嘅野係 Jayson 媽一貫嘅宗旨。搞成咁，可能係我嘅錯，因為我永遠都係喺唔適當嘅時候，做唔適當嘅野。呵呵呵…

最好笑係 Jayson 嫲嫲。Jayson 表弟喺到食奶奶，姨姨要逗佢玩，嫲嫲就話食緊飯唔好玩。但當 Jayson 食飯嘅時候，佢就會叫 Jayson，逗佢玩。正是「有口話人」是也。哈哈哈…

餐飯食得都幾急，因為要交番張檯俾人。

Jayson 見我抱住第二個小朋友。好似有啲呷醋。哈哈哈…

「你表伯我好耐冇抱咁細嘅小朋友啦！」

「睇住我呀，表伯！」

~ Lindberg