Tag Note about Me

恭喜發財！牛年第一Tag，係好耐冇見嘅可梨喺 Facebook 到踢我，而火羽再補一腳，我當然要好好回應一下啦。

規則：當你比人tag左，就要寫一篇note，內含 16 項有關你的事情，習慣，喜好，目標....或任何各不相干但有關你的東西。最後tag另外 16 個人。你必須tag返tag左你的那個人。如果我tag左你，即係我想認識你更深。

我就唔 tag 人啦。要寫 16 個已經寫到我手軟，一陣要我寫多兩次都唔知點算。其實要寫 16 項有關自己嘅野真係唔易。我就從一啲我嘅「問題」出發：

1) 患有嚴重「中文文盲」：基本上，我個網誌係用 Yahoo 字典打成嘅。死未？所以睇到錯字，請不要見怪。

2) 患有嚴重「網絡不能脫離症」：除咗瞓覺，都會見到我上網。

3) 患有中度「地中海貧血」：踎低起身見頭暈。

4) 患有中度至嚴重「妄想症」：新袍仔呀…

5) 患有「遺傳性坐車渴睡症」：一坐車就即瞓，唔理有冇位坐都好。全家人都係咁。

6) 患有「選擇性潔辟」：如果地方係人地整亂嘅，我會覺得好討厭。

7) 患有「選擇性失聰」：咩話？

8) 患有「嚴重短期記憶障礙症」：頭先我想打乜呢…？

9) 患有「妄想征服地球症候群」：情況同班 K 隆星人差不多。

10) 患有「坐骨神經痛」：壞姿勢累事。唉…

11) 患有嚴重「屁股痕」：需要定期用重金治理。

12) 患有「過份忠心症候群」：打死一世牛工。

13) 患有輕度「閱讀困難症」：會讀錯次序，或者讀咗自己以為睇到嘅野。

14) 患有中度「痴肥症」：…

15) 患有「心講咗就以為口講症候群」：可能自少自己都係同自己玩，有時心入面講咗，就以為講咗俾人聽。好彩，只會選擇性喺屋企發生。

16) 患有「死口唔認心講咗就以為口講症候群」：明明我頭先講咗啦。

有興趣嘅朋友，都攞嚟玩下啦！哈哈哈…


~ Lindberg