盲腸戰後記

鼠年年尾，相信對我一家應該係有啲影響。首先係部抽濕機仙遊咗，然後個電熱水壺亦都相繼停工。但真係估唔到，自己原本嘅腸胃炎，原來係盲腸炎。好彩條盲腸冇穿到，否則我一定搵第一日睇我嘅黃綠算帳！

割完盲腸之後嘅一日，我打電話俾媽媽。我先至醒起，大哥同二家姐都割過。所以話盲腸炎有家族關系，都未嘗冇道理。當年佢兩個要開一個三寸長嘅大洞，休息足一個星期。而我只要開一個 1 厘米嘅洞，再加兩個小洞，就可能將條盲腸攞出嚟。醫學真係進步咗好多。

入到養和，當我見到我個五星級床位之後，我眼都突埋。之前 Jayson 媽生 Jayson 住喺舊翼，仲要自己帶電腦。呢個細細嘅床位，竟然有部電腦釣落嚟俾我用。除咗上網，仲可以睇電視！厲害厲害！

第一日等做檢查嘅時候，我地兩個就不定咁玩。之後開咗刀就當然冇心情啦。

喺醫院嘅時候，其實最辛苦，唔係肚痛。因為我相信最痛嘅時候已經俾我捱過咗。最辛苦係發燒，周身唔舒服。其次就係打點滴。

伙食方面，養和真係一流。第一餐嘅粥水都幾有米香。第二餐可以食有米粥，就整咗碗碎雞粥。好正！而 Jayson 媽又點可以錯過養和著名嘅：「貴妃雞飯」呢？好有味，所以對病人嚟講，真係好開胃嘅一道菜。必食！

之後嘅早餐係雪菜肉絲米，亦都係勁好味！姑娘見到我，問：「嘩，乜你唔係要食軟體飲食咩？」。我話：「醫生話米粉得呀嘛。」哈哈哈…

帶番屋企嘅，有同事送嘅花（新年可以慳番！）。

仲有我條腸…

係唔係應該搵個地方釣地佢呢…？同阿仔條臍帶一齊釣起都好喎…

是日精選微創開刀割盲腸特餐，盛惠$64,000。求神拜佛，保險一定要賠得足呀…

三個傷口，其中一個有啲血水滲出。所以一陣要去覆診。希望可以快啲埋口，可以抱下 Jayson 啦！尋日俾 Julie 伸咗我一腳，痛到出唔到聲…



~ Lindberg


P.S. 其實除咗自己，Fred  哥跟我差不多同一時間入廠。佢仲慘，要割膽石。睇嚟牛年對我地呢班人，真係唔係太過樂觀。但希望經過今次一劫之後，牛年就順順利利啦！！