海洋公園戰記

12 月 29 日，我地一行 15 人去咗海洋公園。對上一次係幾年前我嘅生日。好多人，印象好差。過咗幾年，點知仲差！問題始終都係人太多，安排又唔好，以致整個經歷都唔係咁開心。好彩係陪屋企人去，所以都仲有啲意義。

「Jayson…」大家姐叫。

「Jayson……」二家姐傻叫。

「Jayson………」大表姐細聲叫。

「Jayson…………」二表姐尖叫。

「阿仔…」媽媽問。「您俾四個家姐玩殘未呀？」

一去到，大家就去睇溜冰表演。見 Jayson 眼瞓，我地三個就冇入到去。喺外面俾佢瞓一覺。然後去咗集古村間酒樓食午飯。我都係第一次去呢間酒樓。一入到去，覺得同飯堂冇乜分別。我仲以為會好似迪士尼間中菜廳咁，或者係一個有氣派嘅龍鳳大禮堂。點知係咁殘舊，感覺好差。好明顯係受過遊行團嘅「洗禮」，先會變成咁。

食物都算唔錯，不過服務「奇」差。我搵唔到更差嘅形容詞去形容，真係工廠飯堂都不如。落單出錯都算啦。啲阿姐仲要呼呼喝喝，好似欠咗佢地一樣。咁多位出餸唔出，係要揀兩個細路中間出。仲要大聲呼喝：「睇住呀！淥死妳呀！」洗唔洗呀？人地冇望住妳，又聽唔明廣東話，想點呀？真係好恐怖！我估唔到餐飲出身嘅盛志文會由得佢變成咁。

之後就上山繼續玩。二伯抱住 Jayson 影番張相先！

人真係多咗啲，樣樣野都要排半個鐘有多。不過都可以接受，因為去到是但一個主題公園，人多咪又係要等。不過問題在於啲海洋生物館。雖然已經分批放人入去，但人嘅天性，就係樣樣都唔好蝕底。一入到去，見到有野睇就死人都唔向前行。搞到入口水洩不通，乜都睇唔到。好似要打交先可以向前行。其實每個館嘅前段都係勁多人，而後面就幾鬆動。前面迫咗咁耐，後面自然要走馬看花啦。有啲人仲神奇，都唔係睇野嘅，只顧向前行，明明都迫到死，都要沖沖撞撞向前行。唔知嘅，仲以為係「文雀」添。

主要嘅大館都係幾十年前嘅設計。係人流控制上未必係預咗好似依家咁多人。我覺得如果輕微調節或改動一下，整個參觀會愉快得多。

「爸爸，好悶呀。明明叫海洋公園，點解淨係得啲人睇嘅？」

仲有。我唔係好明啲人做乜排喺人地後面，都要頂下頂下前面個背脊。因為我發現好多內地人都係咁，所以我覺得係上面嘅排隊習慣。有乜好頂呢？前面有得行咩？頂住會行得快啲咩？而且頂頂拱，同你 / 妳有親咩？上一次勞氣到要擰轉面，問：「頂夠未呀？」今次 Jayson 媽不停俾人頂，我同佢對掉位，用個背囊頂番轉頭。不過就算我點頂法，後面都係不停咁頂住我。天啊…！

仲有仲有。行路又唔帶眼，又唔知趕住去邊，都唔睇下我前面有架嬰兒車。我已經行直線啦，啲人都仲可以一腳一腳咁踢落架車到。之字形行定係八字腳得咁厲害呀？好彩抱起咗 Jayson 啫。但真係俾人踢到好抆憎。如果可以的話，下次我會換啲有釘雪呔，然後喺架車仔四邊加滿鐵勾，仲要生鏽嘅。前面兩邊加把電鋸仲好！踢呀啦！

廣告講嘅聖誕樹，都幾有意思嘅，係唔同學校用環保裝飾。不過我鐘意我屋企嗰棵多啲。《馬達加斯加2》係嚴重「把鬼」。喺個電影院入面放啲野俾遊人影相，都幾無聊。第一次見熊貓盈盈、樂樂，佢地好可愛呀。唔似安安同佳佳咁，佢地可以住埋一齊，可以一齊玩，感覺開心好多。見到佢地，就令我諗起阿威。以前抱過阿威出街，俾一班幼兒園學生見到。老師指住阿威，問大家係咩嚟。

「貓！」大家答。

「唔係呀！」一個小朋友答。「黑色白色，係熊貓嚟㗎！」都答得啱呀，熊貓係國寶，阿威都係我全家之寶。

去一次海洋公園，真係好似去打仗一樣。但話雖如此，我地都會再去。好想俾 Jayson 睇下啲動物。雖然睇電視都得，不過始終不及睇真嘅。而且都係教育嘅一種。但下次再去，一定唔會搵啲假期前後去囉。



~ Lindberg