我們的春節假期

再一次恭喜大家發財！今年春節假期過得好忙。原本只係得三日假期，因為小小一條盲腸，變咗十幾日長假。到咗今日，身體先覺得冇咁虛弱。小腹三個竉都仲有啲痛。因為行路慢半拍，又抱唔到 Jayson，所以樣樣野都做得好吃力。

先係年廿九，因為見 Jayson 咁懶，所以我忍痛都要去花市幫佢「賣懶」。

花市勁多人。所以我地只係行咗半條濕貨就走啦。Jayson 媽好有心機地去買咗幾支靚花返屋企插。

「祝大家大吉大利！」

年初一去咗嫲嫲屋企。原本每年初一，我起都會喺自己屋企，先派利是俾班細路，然後影張全家福。點知成朝萬七咁多野搞，我地搞到一點半先可以出門口，所以乜都冇做到。兩點先上到嫲嫲屋企。食完晏之後有好多人上嚟拜年。亂完一大輪之後，我地就返屋企休息。（漏咗同嫲嫲影相… 仲漏埋部相機喺嫲嫲屋企…）

年初二例牌到婆婆屋企開年。Jayson 媽又變咗幪面熊貓俠。唉…

Jayson 亦都開始打乞嗤，仲有小小鼻水。相信兩位都係俾爺爺嫲嫲傳染咗。唉…

喺婆婆屋企，Jayson 有公公婆婆睇住，我地都算有得休息一下。

年初三，一早見 Jayson 有些少燒，又流鼻水，所以決定帶佢去附近嘅醫生睇一睇。睇開嗰個醫生要初五啟市，希望呢位唔好太過黃綠。

診所入面啲病人非常冇品。都唔明點解經歷咗 SARS，啲人嘅衛生常識仲係咁差。咳都唔揞住個口，仲要好似好過癮咁四圍咳。不過可能同衛生常識冇關，係真係冇品！Jayson 兩母子見到咁嘅情況，睇完醫生就即刻行咗出去。而我就喺診所入面等攞藥等咗好耐，等到差啲頂唔順要鬧人。初三… 赤口也…

睇完醫生，返屋企休息。咁就完咗個假期喇。

尋日車公爺爺支簽真係嚇死人。對上一次嘅下簽，相信大家都記得之後發生咗咩事。自上次之後，相信冇乜邊位政府官員願意初二去搵車公爺爺求簽。不過有啲人唔去又唔得。今次簽文仲要來得咁應。依我所解，簽文直頭有自作孼之意。「禍去禍來因自招」，貪字得個貧。所以只好為各位朋友祈求，今年可以事事順景，逢兇化吉。善哉… 善哉…



~ Lindberg