婚宴 @ 四季

上回講到 Jayson 媽幫 Elma 姑姑上頭。第二日，我地當然有得飲啦。起初聽到去四季飲，真係以為有得打邊爐！可惜事與願違，係四季酒店。

知道有得去四季酒店，Jayson 好興奮，因為未去過，所以想睇下有幾靚。因此，我地為 Jayson 買咗套飲衫。我發現幫女仔買，係容易過幫男仔。而且仲平啲。上次我買咗件靚靚嘅裙俾殘哥個女，都係六、七百。我地想幫 Jayson 買件西裝褸，一件都已經過五百！Jayson 媽仲想加件冷背心，點知件冷衫仲貴！好彩幾經辛苦，終於俾我地搵到套平啲嘅。褸同冷衫加埋都係六百左右。因為好可能只著得一次，所以都唔想買太貴。不過冇計啦，要著靚靚見人嘛。

四季酒店嘅禮堂雖然唔算好大，放二十幾圍檯，但好有氣派。見到一大班 MBA 嘅同學，唔知嘅，仲以為係同學聚會。哈哈！

Jayson 因為朝早出咗去玩。出門口嘅時候，我地要叫醒佢，所以心情好唔靚。好彩都唔算扭計。係唔多理人囉。唉…

「爸爸，契爺又買新玩具呀？」

「係呀！止痕呀嘛。但如果佢冇新玩具（24-70 f/2.8），又點可以幫您影靚相呢？」

除咗新鏡頭之外，契爺喺日本仲買咗部印相機。同打印式嘅唔同，佢呢部係用寶麗來，係極之屁股痕嘅人先會買。但印出嚟嘅相真係幾得意。即影即印即分享。

其實我好想 Jayson 去親近下一班朋友。因為全部都係好錫佢嘅叔叔同嬸嬸。不過佢又玩怕醜。有時我都唔係好明。明明成日去飲茶，一對蝦餃面俾無數咁多個阿姐玩過，都係會怕醜嘅呢？但我地又發現， Jayson 真係好睇人。酒樓啲阿姐，唔係個個都同啋。有啲一見就笑，仲叫人同佢玩，有啲就啋都唔啋。激死人！

講番個婚禮。入場嘅儀式好感人。除咗「例牌」嘅雙方照片之外，仲有二人之前錄影嘅真情剖白。睇完之後，就知道新郎哥如何贏得美人歸。恭喜… 恭喜…

之後就準備開飯啦！

「爸爸，唔好掛住玩啦。我要開飯先啦！快啲手啦！」

「係啦！係啦！」

四季啲野好好食！除咗條魚熟咗少少之外，其他都好好味。調味好好，顏色配搭同擺碟都好靚。所以食得好開心。但可惜，因為要服侍 Jayson，養成咗食飯食得（更）快嘅惡習。牛嚼牡丹，真係有啲浪費！

食嘅時候，Jayson 耐唔耐都有扭計。好彩有 Raymond 叔叔逗佢玩。之後我又同佢行下，恭喜一下契婆婆，見下彤彤（同 Jayson 同年同月同日生嗰個），圍住自己張檯行十個八個圈。真係頭都暈！

食完雞之後，Jayson 終於頂唔順。所以只好走先。我仲好想食埋個荷葉飯、麵、糖水、美點雙暉。唔知有冇果盤呢？唉…



~ Lindberg