左耳耳骨骨折

尋日放對手入西裝袋，準備攞個耳筒出嚟用。但竟然發現我個 Shure e3c，左邊耳斷開咗！

點解放係西裝袋都會斷開，呢個係一個謎。我估可能係我掛件衫喺張椅上面，俾其他椅撞埋去時撞爆。勁肉赤！

第一時間，我覺得救唔番。即使俾我黐得番，都有機會甩。如果甩咗喺我耳仔入面，都幾大鑊。而且個耳筒嘅質素差咗，都係時候換過一個。

我起初問 Jayson 契爺。原來契媽買咗個 Shure e310 俾佢做聖誕禮物！我估要 $1,800！發達！（點解我乜都冇嘅…？）雖然我好痕，但真係唔捨得。我個 e3c 係 Fred 哥幾年前幫我喺美國特價時買嘅，$1,000 已經係我嘅極限。

之後我問郭生有乜好提議。佢話有一隻佢想買，但提唔起勁去試，所以唔知好唔好：

http://www.nuforce-icon.com/Product-earphone.htm

見個樣都唔錯，發現香港只有一個地方有得賣：

http://www.boa.hk/

$400 咋！仲可以配合 iPhone 電話功能。買嚟試下都好呀。

因為人生唔可以冇咗音樂，所以我就立即打去問佢幾點有人。唔食晏就飛咗過九龍睇一睇。

細細地嘅 Showroom 有好多音響設備。我話想要個 NE-7M，個老闆就攞個新嘅俾我試。一放入耳，我即刻笑咗出嚟。真係好清。中高音都唔錯。個老闆話 NE-7M 好過 Shure e310 兩班。雖然好似有啲誇張，不過真係起碼好過我嗰個。老闆叫我試下佢煲起咗嘅舊耳筒，佢話只要用上十幾個鐘，個耳筒就可以發揮得最好。佢話啲低音層次分明，絕對係得。雖然放人地個耳筒入耳都幾核突，不過佢咁有誠意，我就試下啦。佢問我煲咗嘅有冇分別，由於面子問題，我死人都話有啦！不過老實講，真係有少少…呱。

而老闆好細心咁繼續推銷。佢話 Shure 用喺 iPhone 有個問題，就係個低音推唔起。我都有同感。而 NE-7M 就冇呢個問題。有好多女仔都鐘意用，而有好多人都訂咗嚟做情人節禮物。不過我就一定唔會送 in-earphone 俾人做禮物。in-earphone 開到幾細聲都好，都聽唔到出面啲聲，所以行街好危險。除非想個情人死，唔係我就建議唔好送啲咁嘅野啦。（契爺，我睇你要檢討一下啦…哈！）

買完之後，我立即用。落到街打個電話俾郭生「報平安」。個咪收音收得好好，好過 iPhone 跟機嗰個。喺西洋菜街，唔洗對住個咀都收得好清。勁！不過我一直覺得啲低音差少少。後來我換一個大少少嘅耳塞（本身係細嘅，仲有中碼同大碼嘅耳塞，仲有另一個海綿塞）。因為貼住個耳窿，啲低音出晒嚟！正！

不過 in-earphone 太貼，會有一個問題。如果啲線跟件衫有磨擦，啲聲就傳入耳。而 NuForce 冇 Shure 落咁重料，啲線輕又幼，所以問題更加明顯。我睇亦都係咁，先會咁平。如果跑步聽一定唔得。所以老闆之前都話，有朋友會搵野夾佢喺身，等佢冇得郁。但如果係咁，我會考慮高一個型號：NE-8，應該會好啲。個老闆話 NE-8 比得起 Shure e410！繼續賣花贊花香。雖然唔可以講電話，不過質素好，而且都係五百幾蚊！真係有得諗！

當然，比上始終不足。如果同我個 Grado Labs SR60 大耳筒比，仲差好遠。Grado 又係郭生同 Fred 哥介紹。我記得 Fred 哥一句：「用咗嚟聽 Twins，把聲都好聽啲！」，我就仆咗去買。超好聲，所以冇得比。

不過行街用，可以有 NE-7M 咁嘅質素，又可以講電話，再加上咁嘅價錢，真係開心到笑。



~ Lindberg