好玩到欲罷不能的 iPhoto '09

身為 Mac 機嘅用家，有兩個軟件件我會諗都唔諗就第一時間買。第一個當然係 Mac OS 本身。同死人 Windows 唔同，Mac 嘅新 OS 會越行越快，而且新功能亦好吸引。另一個就係剛剛新鮮出爐嘅 iLife。iLife '09 主要係用嚟處理相片同影片嘅軟片。'09 比起對上'08 有唔少改進，而我覺得最好玩，就係喺 iPhoto（一個用嚟處理相片嘅軟件）。因為佢多咗兩個功能：Places 同 Faces。

Places 係可以將拍攝地點嘅資料，加入張相片上面。如果部相機有全球定位裝置，或有外置系統，咁就可以標籤位置。可惜，個程式有啲問題。好多人（包括我在內）都用唔到。相信 Apple 正在努力處理中。

而另一個功能係 Faces。相信有玩 Facebook 嘅，都知道可以自行標籤相片上面每一個人嘅樣。而 iPhoto 嘅新功能，就係自動幫你做。首先，電腦用咗七個鐘頭嘅時間，去處理我 23,000+ 張相上面每一個面孔。其實都算幾快。之後我就話俾佢知邊個係邊個。起初認人認得好差。有戴眼鏡就話係我，激死！如下圖，最初竟然當咗個鬼妹係我朋友阿蘇！

不過當我標籤埋幾他人，同埋話俾電腦知邊啲認啱，邊啲認錯，佢就越嚟越準。之後就差不多 98% 準確。有人話貓都認得到，不過我仲未試。

我坐喺部電腦面前，不停咁答對或錯。不知不覺就玩咗幾個鐘！真係好難停手㗎，因為我有「選擇性潔辟」，樣樣野都要齊齊整整。而且可以睇番啲舊相真係好得意。依家我已經認出大約一百個人嘅樣。

其實哩個認樣功能真係好正。我自己唔多玩 Facebook，所以我都未必會上載啲標籤咗嘅相上去。但有時想搵番某某啲相嚟睇，以前真係搵到天光都搵唔到。但依家有晒名，真係話都冇咁易。

睇番爺爺、嫲嫲、公公、婆婆啲相，咁多年以來，真係蒼老咗唔少。希望佢地都身壯力健，長命百歲，等 Jayson 大個之後可以孝順下佢地。



~ Lindberg