有賣點但未夠班的「近又」

尋晚落咗旺角，想搵地方食野。行下行下，行到朗豪坊。原來咁耐以嚟，我地都未行過朗豪坊。見佢有好多野食，我地被一張廣告海報所吸引，上面有塊炸得金黃黃嘅豬扒。於是就上去睇睇。

近又吉列黑豚專賣店
地址：旺角亞皆老街8號朗豪坊L11-13舖
電話：2363 6633 / 2332 6868

未入門口，先睇一睇個餐牌。見價錢比銅鑼灣嘅 Tonkichi 平 $20 左右，便安心入去試一試。
隔離張檯有兩個姐姐。其中一個話飽，所以唔想食。但餐廳經理話一定要一人叫一個。其實檯面都有張卡提示客人。但間餐廳又唔係滿，好心就算啦。最後佢地就黯然離開咗…。

我地叫咗兩個定食。一個係招牌菜：吉列千層芝士黑豚肉定食，另一個有炸蝦同炸帶子。一齊撈亂食。

原本我想叫兩個招牌餐，一個要芝士味，一個要另一種味。但 Jayson 媽問我，如果唔好食點算。好彩有聽佢講！其實我起初都有懷疑過。所謂嘅千層芝士黑豚，只係用一塊塊嘅薄切豬肉片疊起，中間放一舊芝士，然後上粉炸。問題在於薄切豬肉片，睇相已經見冇乜汁。可能啲肉唔夠肥膏，所以冇豬味。任何肉類嘅味道，都係來自脂肪。雖然薄片入口鬆化，因為唔見肉汁，食起上嚟，只有芝士味。唔值 $158。

而醬汁方面，人地 Tonkichi 會俾一碗炒香咗嘅芝麻，等客人自己慢慢磨。除咗新鮮磨會香啲之外，新鮮炸野係需要時間，磨芝麻不失為一個好好嘅消閑節目。可惜，呢到冇。只有一碗唔多香嘅芝麻碎。而加入啲芝麻碎嘅醬汁就偏酸。佢啲野食未至於要咁酸嚟消滯。而且佢有「任食」椰菜絲（同白飯），啲沙律汁已經夠酸啦。

另外個炸蝦同炸帶子就不過不失。有兩隻大蝦同兩隻大帶子。佢嘅炸粉，印象中比 Tonkichi 輕一啲。都算係一個靚嘅吉列。

當 Jayson 媽飲個麵豉，佢忍唔住笑咗出嚟。因為十足十去燒味店飲嘅例湯。之前一晚賣剩嘅燒肉就放晒入去。不過呢到又唔係咁差嘅。個麵豉湯入面有炒過嘅紅、白蘿蔔，仲有啲炒過嘅豬肉。係感覺似例湯，但飲落都唔錯嘅。

服務方面，除咗以上講嘅死板要求，都算幾好。埋單仲識問人攞意見。我差啲想同佢講：「我想保留我嘅意見…」要食吉列，去番 Tonkichi 食豬扒啦！



~ Lindberg