牙簽的秘密

前一排，Jayson 媽講咗一個佢同事嘅經歷俾我聽。我一直都好在意，所以決定同大家分享一下。

以下關於牙簽嘅情節，全部屬實，但可能令人情緒不安。敬請留意。

Jayson 媽嘅同事（下稱同事）有一日去到一間茶餐廳食晚飯。見到一個著住拖鞋嘅人入嚟食野（下稱拖鞋人）。拖鞋人（跟拖鞋飯冇關…應該…）坐咗喺佢對面檯。食完飯之後，翹起一隻腳，腳䟴䟴眼望望，伸手要攞牙簽。佢一手攞起牙簽筒，然後輕輕扭開個蓋。但照常理，應該喺牙簽筒蓋上嘅小洞，倒出牙簽，先至衛生。

同事以為佢想搵支好啲尖啲嘅牙簽，方便撩牙。然而拖鞋人並冇抽出一支牙簽。佢將所有牙簽倒出一半，然後一手攞住，成為一束。之後恐怖嘅事情就發生啦…

拖鞋人除低拖鞋，然後就用呢束牙簽嚟括腳板底！完事之後，佢將牙簽放番入牙簽筒，上蓋，放回原位。拖鞋人若無奇事咁離開茶餐廳。伙計睇唔到，同事冇出到聲，之後… 相信唔洗再點講。

聽到呢到，我隱約感受到，一堆牙簽喺腳板底下，刮下死皮嘅快感。如果用帶有薄荷嘅牙簽，更會有清爽涼快嘅感覺。另一方面，我從此對牙簽，就帶有一股莫名嘅恐懼。包裝好嘅牙簽，可以用。沒有死皮嘅牙簽，可能可以用…

完。



~ Lindberg