Zippo 暖手器

今日咁鬼凍，不如介紹一樣可以暖身嘅野。市面上有好多款暖蛋，有用化學反應嘅、用電芯嘅、有叉電嘅、仲有 USB 叉電嘅。不過我始終覺得嗰啲唔夠熱，而且通常只熱得三五個鐘，唔係咁理想。所以都係呢隻 Zippo Handy Warmer 暖蛋好。

見到 Zippo 呢隻牌子，當然就係用氣油㗎啦。主要有個不鏽鋼暖蛋、隔熱布袋、同一個油壺。崇光賣 $3XX 一個。

原理係點著下圖嘅白色觸媒芯。佢唔會真係著火，而係燃燒住暖蛋入面嘅氣油，見唔到火種。因為都幾熱，所以有個布袋俾你放隻蛋入去。溫度就啱啱好，可以用手揸住嚟取暖。

暖蛋可以入兩個油壺份量嘅油，暖足二十四小時。但缺點係一經點著，就冇得停。其實都可以拔走個觸媒芯，冇氣油就會停。不過要練成「鐵沙掌」先做得到。而且如果入面剩咗啲氣油，下次有機會落多咗。

而安全方面，有幾點我自己覺得要注意一下。第一，唔好入太多油。多到倒得出嚟就有機會著火。第二，唔好俾小朋友玩，唔好瞓覺用，要好好保養。第三，如果放入衫袋，入面唔好放電話之類嘅野。如果爆炸，唔好話我冇講過。

雖然有以上嘅危險，不過我認為都好安全。而且我唔覺得其他啲暖蛋會安全得過佢幾多。只要小心用，就可以過一個溫暖嘅冬天。



~ Lindberg