台灣之旅： 第一天 士林之夜

今個聖誕，我哋跟屋企人一齊到台灣玩。如果唔係因為全家齊人（十九人），我哋都唔係太想飛，因為旺季飛真係好貴！！！

飛機上，長榮嘅坐位好舒服。我哋懷疑俾人放咗喺機頭嘅商務客位，因為見同後面啲位有啲唔同。而且同前排有好一段距離，坐得幾爽。Jayson 帶咗一個好危險嘅「過四關」遊戲去玩。我好驚佢唔見哂啲粒粒，因為呢件係我幾十年前嘅玩具！跌咗幾粒就冇得玩啦。

酒店喺台北 101 附近。安頓好之後，爸爸面帶不悅咁問：「呢間酒店邊個揀㗎？」

二嫂答：「係家姐同我囉…」

爸爸好失望咁話：「我以前住嗰間，一落街就有好多靚女㗎。點解呢到乜都無？」

突然間，我覺得跟爸爸嘅距離拉近咗。

（因此，我已經將以上酒店列入黑名單！）

兩點幾到酒店，成班細路掛住玩，搞到四點幾先出到門口。第一個節目，就係去掃街！適逢 Jayson 契爺都蒞咗台北，所以我哋離開大隊，走咗去搵契爺契媽到士林夜市掃街。

先來「阿宗麵線」打底。印象中仲係西門町嘅膠碗麵線。依家有位坐（但冇枱），可以舒舒服服咁食。Jayson 好鐘意食，果然係福建人！

因為要先令 Jayson 食得飽，我哋去咗買立體造型雞蛋榚，亦即係有造型嘅雞蛋仔。

「Jayson，唔好吞槍呀！」

除咗得意，味道真係非常一般。之後就豪一豪，豪大大雞排！雖然香港都有豪大大，味道都冇乜分別。但喺呢到食，氣氛已經唔同啲啦！

生煎包。很多蔥！唔洗客氣。

山豬肉腸配日本芥末汁。其實好多種醬汁，我是但選擇咗日本芥末汁。出奇地刺激好味！

食得七七八八，我哋決定去新士林市場睇下。新士林市場前一日先開張，所以好多人都趁熱鬧嚟睇下。

新士林市場地面係賣乾貨，地庫就賣熟食。一落到樓下，真係超多人！同行年宵冇乜分別，一個貼一個咁行。好誇張呀…

除咗超多人，呢到仲有超大油煙！煙霧彌漫，真係伸手不見腳趾。食物種類好多，地道小吃、蚵仔煎、花枝焿、鐵板燒、粉圓愛玉等，應有盡有。每一檔都燒到火紅火綠，所以油煙好勁。

可能因為只係開幕了一日，所以即使係星期一晚，都係超多人！

我心諗，如果喺香港，呢到一定出唔到牌。地庫咁多油煙，又有明火，如果發生甚麼意外，例如火燭、氣體爆炸等，後果不堪設想。不過正因如此，台灣嘅飲食文化先有得咁百花齊放。不過俾著我下次都未必敢再蒞…

因為 Jayson 瞓著咗，Jayson 兩母子無落到嚟。佢媽咪想食大餅包小餅，所以我買咗一個紅豆餡嘅。軟皮包住一個炸脆咗嘅麵餅，入面包住紅豆。口感層次唔錯，不過味道唔夠突出。我鐘意食甜啲。

契爺來了一個蚵仔煎。喺寒冷嘅天氣之下，份外好味。

離開咗呢個危險地方之後，就去搵雪片做甜品。四碗價錢，香港只係食到一碗。真係超抵呀！

最後，我哋買咗幾個「大上海」嘅生煎包，俾 Jayson 做宵夜。然後就跟契爺契媽道別，佢哋第二日就要飛番香港，而我哋就會繼續我哋嘅七日之旅。

~ Lindberg