小學生閃卡事件

有一日，我同事好擔心咁行過嚟我個位，細細聲咁同我講：「我個女間學校出咗個陳冠希…」

好彩當時我口中冇嘢，唔係真係有乜噴乜。佢個女小學五年班咋喎！起初真係俾佢嚇死，但經過一輪隱晦嘅解釋之後，原來係除衫玩自拍，唔係發生乜嘢性行為（呱…）。但已經夠死！好彩及早發現，否則唔知下一步會變成點。

估唔到「閃卡」事件，竟然會發生喺小學五年班入面！啲細路有冇咁早熟呀？！我哋仲考慮過俾 Jayson 去讀嗰間小學㗎。靠…

詳細情況就不便多講。簡單嚟講，就同陳冠希或某富商懷疑非禮港男一樣，問得多，總有一個搭上。男童用 Whatsapp 廣邀同學「參與」，加上本身已經有女朋友參與其中，所以說服力就越大。

同事話間學校已經做哂性教育，叫啲男生要尊重女生，點解仲會有咁嘅事情發生。我覺得係兩方面嘅問題：1）意志力；2）道德觀念。

好多朋友都會話，邊到會有啲咁白痴嘅人㗎。轉運、整車呢啲嘢都會上當嘅？但我就覺得一啲都唔奇。正如嗰啲「乳房協會」、「消防中心」、賣文具等嘅電話，日日都會打嚟，就即係證明總有人上釣啦。只要咁啱符合到某啲條件，再加上無路可退嘅壓力，人嘅意志力就會崩潰。男生嘅背景地位、故事環境嘅配合、好奇心再加上群眾嘅壓力，腦袋入面就好似有一條幼幼嘅線，再加多少少力，斷咗！咁就幾咁唔理性嘅嘢都做得出。

而現時社會嘅道德觀念係點，我亦唔洗多講。我係極之討厭公眾人物行為唔檢點，再加上報紙雜誌嘅加鹽加醋或看圖作文，漣漪所產生出嚟嘅後果，係可以超乎想象。我仲記得陳冠希事件剛發生冇耐，我喺地鐵車廂內聽到兩男一女中學生嘅高談闊論。佢哋外表斯文正常，起初對於其深入討論，我可以當作對事件嘅客觀分析。但之後其中一個男仔話：「唓！佢有幾犀利啫，我都大過佢啦。」當時我雙眼一突。第一，我極之懷疑佢係真唔係。第二，我未試過跟人喺大庭廣眾談論我嘅性器官大小。第三，地鐵車廂中，知唔知個「醜」字點寫呀？之後更露骨嘅對話，我已經唔想記得啦。

「唓！阿邊個議員都講粗口啦！」「唓！阿邊個藝員都飲酒開車啦！」「唓！有乜大不了啫，阿邊個都有做啦！仲要幾個一齊上添！」

互聯網嘅發達，令資訊更容易傳開去。好嘅會傳開去，壞嘅就更容易。記得當我第一次睇《東莞的森林》嘅時候，第一個反應係拍案叫絕。用村上體（村上春樹嘅寫作方法），喺網上論壇連載嫖妓故事，真係叫人大開眼界。但睇咗幾章節之後，我就無法繼續睇落去。並非自命清高，但我真係接受唔到作者嘅寫法。嫖妓幾時變成咗一件以史詩式記載，可歌可泣嘅事情呢？！正如作者第一段所寫，佢打一個冷震，所有拜讀佢連載嘅大小朋友，價值觀都立即完全地崩潰。喺作者炫耀自己嘅豐功偉績嘅同時，有冇諗過對社會嘅道德觀念會帶來乜嘢嘅影響呢？

當然，有啲人可以話時代「進步」，思想開放係好難免。但只要係有子女嘅朋友，相信冇一個會希望見到會太「進步」。呢一個並非係保唔保守嘅問題，而係當上父母之後，都會希望好好守護下一代嘅問題。就例如講粗口係一種文化，但當自己講粗口，會唔會由得自己個仔爆粗呢？但如果有朝一日，個仔明白呢個粗口文化嘅背景，明白一句粗口嘅意義及象徵，而選擇去爆粗，我唔會有異議。如果只係受外界因素，而影響自己嘅決定，咁就唔希望見到囉。

見到同事個樣，真係幾愁。希望我有排都唔洗面對呢個問題啦。唉…



~ Lindberg